თბილისის მერის მოადგილის თქმით, ოჯახები, რომლებიც არ საჭიროებენ კომუნალური ვაუჩერით დაფინანსებას, შეიძლება ამ კუთხით იყვნენ "ჩახსნილი".

როგორც ირაკლი ლექვინაძე ამბობს, დღეს კომუნალური ვაუჩერით ყველა ოჯახი სარგებლობს, რისი აუცილებლობაც არ არსებობს.

რაც შეეხება ელექტრონერგიის ტარიფს, მერის მოადგილის ინფორმაციით, ისინი გადაწყვეტილებას სემეკიდან ელოდებიან.

„ის ოჯახები, რომლებიც მსგავსი ტიპის ვაუჩერებით დაფინანსებას რეალურად არ საჭიროებენ, შეიძლება ამ კუთხით იქნას "ჩახსნილი". დაფინანსება დარჩება იმას ვისაც, ეს ყველაზე მეტად სჭირდება. ასეთი საჭიროების ოჯახები თბილისში რეალურად არიან. ის, რომ მაღალი შემოსავლის მქონე პირები, საშუალო და საშუალოზე მაღალი შემოსავლიანობის მქონე პირები, მათ შორის ბიზნესმენები, ასეთი ტიპის ვაუჩერული დაფინანსებით სარგებლობდნენ და ზოგიერთმა მათგანმა არც კი იცის ამის შესახებ, ეს არის ხარჯი, რომელიც უფრო ეფექტურად შეიძლება იყოს გამოყენებული", - განაცხადა ლექვინაძემ.