ნაძალადევის რაიონის გამგებელი ზაზა გაბუნია მახინჯაურისა და საყვირის ქუჩების მცხოვრებლებს შეხვდა და მიმდინარე საგზაო სამუშაოები დაათვალიერა. ნაძალადევის რაიონის გამგეობის დაფინანსებით, მახინჯაურსა და საყვირზე გზის კაპიტალური რეაბილიტაცია მიმდინარეობს. პროექტის ფარგლებში, ორივე ქუჩაზე მოეწყო საფუძველი, ბორდიურები, დაიგო ასფალტის ქვედა ფენა. რამდენიმე დღეში კი დასრულდება ტროტუარების მოწყობა და გზის სავალ ნაწილზე ასფალტის ზედა ფენა დაიგება.

„დაახლოებით 40 წელია, ამ ორ ქუჩაზე საგზაო ინფრასტრუქტურული სამუშაოები არ განხორციელებულა. მოხარული ვარ, რომ კაპიტალურად ვაკეთებთ, როგორც მახინჯაურის, ისე საყვირის ქუჩას. რაც მთავარია, კმაყოფილია მოსახლეობა. შეხვედრის დროს ადგილობრივი მცხოვრებლები იხსენებდნენ, თუ რა რთულ პირობებში უწევდათ ტრანსპორტით და ფეხით გადაადგილება. ახლა კი მოხარულები არიან, რომ მათ ქუჩებზე ასე ხარისხიანად სრულდება საგზაო სამუშაოები“ - განაცხადა ნაძალადევის რაიონის გამგებელმა ზაზა გაბუნიამ.

პროექტის დასრულების შემდეგ საგზაო ინფრასტრუქტურა 5 320 კვ/მ-ზე მოწესრიგდება. ორივე ქუჩის სარეაბილიტაციო სამუშაოების ღირებულება 160 000 ლარს შედაგენს.