ასეულობით ათასი თბილისელი კომუნალური დახმარების გარეშე დარჩება

ასეულობით ათასი თბილისელი კომუნალური დახმარების გარეშე დარჩება - აბესაძე

საზოგადოება - 17:17, 03 Aug, 2015

1486

თბილისის ბიუჯეტს რომელიც დღეს საკრებულოს რამდენიმე კომისიის გაერთიანებულ სხდომაზე განიხილებოდა ოპოზიცია მხარს არ უჭერს. მათი განცხადებით, დოკუმენტში თანხები არასწორადაა გადანაწილებული, ხოლო წარმოდგენილი ცვლილებები კომუნალური ვაუჩერების დაფინანსებას საერთოდ არ ითვალისწინებს.

„მილიარდიან ბიუჯეტშიც კი, ხელისუფლება თანხას ზოგავს ყველაზე გაჭირვებულ ადამიანებზე, კვლავ არ არის არანაირი ცვლილება კომუნალური ვაუჩერების მიმართულებით და, როგორც ჩანს, მართლაც, ათეულობით ათასი, ასეულობით ათასიც კი, თბილისელი დარჩება კომუნალური დახმარების გარეშე, გაზრდილი ტარიფის მიუხედავად. კვლავ თანხები გამოიყოფა ოლიმპიადისთვის, სადაც თანხების ხარჯვის კანონიერება და ეფექტურობა ნამდვილად კითხვის ნიშნის ქვეშ დგას“, - განაცხადა თბილისის საკრებულოს ფრაქცია „ნაციონალური მოძრაობა - თბილისის“ თავმჯდომარემ ირაკლი აბესაძემ.

თბილისის ბიუჯეტი წელს 46 მილიონი ლარით იზრდება და 1 მილიარდ ლარს აღწევს. აქედან თბილისის ახალგაზრდული ოლიმპიური ფესტივალისთვის გამოიყოფა 4 მილიონი ლარი და მხოლოდ წელს ამ ღონისძიებისთვის 94 მილიონი ლარი დაიხარჯება. 20 მილიონი ლარი 13 ივნისის სტიქიის შედეგად დაზარალებულთა ოჯახების კომპენსირებისთვის არის გათვალისწინებული, 17 მილიონი კი - ინფრასტრუქტურის აღდგენისთვის.