გრიგოლეთში მომხდარი ავტოკატასტროფის შედეგად გარდაცვლილები ზუგდიდის რაიონის სოფელ რუხში გადაასვენეს. საბედისწერო დღეს გარდაცვლილთა შორის ერთ-ერთი ფეხმძიმე 25 წლის ლელა ლურსმანიშვილი იყო. ამავე ავტომობილში იმყოფებოდა ლელას მეუღლე, 25 წლის გურამ ბალხამიშვილი და მათი 2 წლის გოგონა – ბარბარე.

ტრაგედიამ, ახალგაზრდა ოჯახის გარდა, ბალხამიშვილების დიასახლისი, გურამ ბალხაშვილის დედა – 43 წლის მანანა მორგოშია, მისი დისშვილი – 28 წლის ელისო ნაყოფია და ძმისშვილი – 25 წლის ობოლი ვიტალი მორგოშია შეიწირა.

„მანანა მეუღლესთან გაშორებული იყო, ქმარი კი თბილისში ცხოვრობდა. მათ არაერთხელ მოუმართავთ გამგეობისთვის დახმარების თხოვნით. მეც არაერთხელ ვყოფილვარ მათ ოჯახში. შეძლებისდაგვარად, გამგეობა ეხმარებოდა კიდეც. ვინაიდან მათი საცხოვრებელი სახლი საკმაოდ მცირე ფართისაა, ადგილობრივი ხელისუფლება ცდილობს გამონახოს რაიმე გზა, იმისთვის, რომ მიცვალებულები დროებით სადმე დაასვენოს“, – განუცხადა „კვირას“ სოფელ რუხის გამგებელმა.

შეგახსენებთ, ტრაგედია 1 აგვისტოს მოხდა. გრიგოლეთში ერთმანეთს “მერსედესის” მარკის მსუბუქი ავტომობილი და მიკროავტობუსი შეეჯახა. შეჯახების შედეგად “მერსედესის” მარკის ავტომანქანა აფეთქდა. იქ მყოფი 6 მგზავრი ადგილზე გარდაიცვალა.

წყარო: http://kvira.ge/