ამ წუთებში აქცია მიმდინარეობს ლანჩხუთის მუნიციპალიტეტის სოფელ გულიანში.

ადგილობრივები სოფლის კუთვნილი მიწის ფართობების ერთ პირზე გადაცემას აპროტესტებენ.

მათი განცხადებით, 69 ჰა, მიწის ნაკვეთი კერძო პირმა ისე შეიძინა, რომ ამის შესახებ სოფლის მოსახლეობამ არაფერი იცოდა, ყველაზე მნიშვნელოვანი კი ის არის, რომ კერძო პირის საკუთრებაში რამდენიმე ოჯახის მიწის ნაკვეთი აღმოჩნდა.

მოსახლეობა პროტესტის უკიდურესი ფორმების მიმართვაზე საუბრობს.

"დავრჩით სასაფლაოს, სტადიოის და საერთოდ ყველაფრის გარეშე. გამგეობასაც მივმართეთ, პროკურატურასაც, თუმცა არავის ამ დრომდე ჩვენთვის პასუხი არ მოუცია. ჩვენი საშველი არ არის. იძულებულები ვართ მივმართოთ პროტესტის უკიდურეს ფორმებს, ის, რაც შემოღობილია დავშლით და ჩვენი ხელით დავანგრევთ"-ამბობს აქციის მონაწილე გიორგი კუპრაძე.

ამ დრომდე აქციის მონაწილეებს ხელისუფლების წარმომადგენლები არ გასაუბრებიან, რომლებიც სოფელში იმყოფებიან და გულიანი-ჩოჩხათი-სუფსის 11 კილომეტრიანი გზის მონაკვეთის მშენებლობის გახსნის საზემო ცერემონიალის დაწყებას ელოდებიან, რაც აქციის გამო ამ დრომდე არ დაწყებულა.

აქციის მონაწილეებს კი არ ეძლევათ ხელისფლების წარმომადგენლებთან გასაუბრების საშუალება.

ჩვენი კორესპოდენტი გაესაუბრა ლანჩხუთის საკრებულოს თავმჯდომარე გოგი ხელაძეს: "საქმე გადაცემულია პროკურაურას, ველოდებით მათ დასკვნას. დარწმუნებული ვარ, რომ ხალხის მოთხოვნა დაკმაყოფილდება. ადგილობრივი ხელისუფლება მათ გვერდით ვართ".

თეა იოსელიანი, გურია