ზოოპარკის სარეაბილიტაციო სამუშაოებისთვის არქიტექტორების ან არქიტექტორთა ჯგუფის დახმარებაა საჭირო.

ამის შესახებ ზოოპარკის ადმინისტრაციის მიერ გავრცელებულ მიმართვაშია ნათქვამი.

„პირველ რიგში დიდ მადლობას მოგახსენებთ იმ მხარდაჭერისთვის, რომელსაც თბილისის ზოოპარკისთვის ამ უმძიმეს პერიოდში მუდმივად ვგრძნობთ თქვენგან.

ახლა კონკრეტული დახმარებისთვის გვინდა მოგმართოთ. არსებულ ტერიტორიაზე ზოოპარკის სარეაბილიტაციო სამუშაოებისთვის გვჭირდება არქიტექტორების, ან არქიტექტორთა ჯგუფის დახმარება. ასაშენებელია რამდენიმე მსუბუქი კონსტრუქციის დროებითი ვოლიერი ცხოველებისთვის, აშენებამდე კი ამ ვოლიერების პროექტებია მოსამზადებელი. თუ ხართ არქიტექტორი და გსურთ ჩვენი დახმარება, ან გაქვთ შესაძლებლობა დაგვაკავშიროთ ენთუზიასტ პროფესიონალებს, რომლებიც მზად იქნებიან თბილისის ზოოპარკისადმი მხარდაჭერა ამგვარად, რამდენიმე მარტივი პროექტის მომზადებით გამოხატონ, ძალიან მადლობელნი დაგრჩებით. ამ ეტაპზე ამ ამოცანის გადაჭრა ძალიან მნიშვნელოვანია ჩვენთვის და სასიცოცხლოდ მნიშვნელოვანი - ჩვენი ბინადრებისთვის.

დაინტერესების შემთხვევაში გთხოვთ მოგვწეროთ შეტყობინება ჩვენი Facebook გვერდის Inbox-ში.

თქვენი დახმარების დიდი იმედი გვაქვს!“, - ნათქვამია განცხადებაში.