დაავადებათა კონტროლის ეროვნული ცენტრი ჰაერის ტემპერატურის მატების გამო რეკომენდაციებს იძლევა.

სპეციალისტები განსაკუთრებით მაღალი რისკ-ჯგუფების წარმომადგენლებს აფრთხილებენ. ასეთები არიან ბავშვები, მოხუცები და ქრონიკული დაავადებების მქონე ადამიანები.

დაავადებათ კონტროლის ეროვნული ცენტრი მოსახლეობას დიდი ოდენობით სითხის მიღებას ურჩევს. სპეციალისტები რეკომენდაციებს სამუშაო პირობებთან დაკავშირებითაც გასცემენ.

ცენტრის ხელმძღვანელი ამირან გამყრელიძე რეკომენდაციებს აძლევს მათ, ვისაც მუშაობა სიცხეში უწევთ. თუმცა მოსალოდნელი მაღალი ტემპერატურის გამო სამუშაოების შეჩერების აუცილებლობას ვერ ხედავს.

„გაიჟღერა პროფკავშირების მოსაზრებამ, რომ მაღალი ტემპერატურის დროს ადამიანებმა რა პირობებში არ უნდა იმუშაონ. ამასთან დაკავშირებით მინდა ვთქვა, რომ შრომის საერთაშორისო ორგანიზაციის რეკომნენდაციებით არ არსებობს ნორმა, რომელიც გარე ტემპერატურის დროს კრძალავდეს ან აჩერებდეს სამსახურს. საქართველოშიც არსებობს მთავრობის დადგენილება, რომლის მიხედვით დამსაქმებლებს აქვს ვალდებულება, რომ დასაქმებულს შეუქმნას კომფორტული პირობები“, - ამბობს გამყრელიძე.

პროფკავშირების წარმომადგენლები კი აცხადებენ, რომ +36 გრადუსი ტემპერატურის შემთხვევაში, მუშაობა უნდა შეჩერდეს.

„უნდა შეჩერდეს სამუშაოები აუცილებლად. ის, რომ საკანონმდებლო ბაზაში ხარვეზია, არ გვაძლევს იმის უფლება, რომ მზის გულზე მომუშავე ადამიანები მივატოვოთ რეგულაციების გარეშე და ვამუშაოთ სიცხეში. ეს არის პირველ რიგში მთავრობის პასუხისმგებლობა და რა თქმა უნდა დამსაქმებლის,“ - აცხადებს თამაზ დოლაბერიძე.