ნაძალადევის რაიონში ინფრასტრუქტურული სამუშაოები 12 ქუჩაზე მიმდინარეობს. მათ შორისაა ძმები გარიშვილების ქუჩა, სადაც ამ დროისთვის ასფალტი იგება. ქუჩის კაპიტალური რეაბილიტაცია რამდენიმე დღეში დასრულდება. პროექტის ფარგლებში, 2 811 მ2 ფართობზე მოეწყო საფუძველი და იგება 2 ფენა ასფალტის საფარი. გზის სავალი ნაწილის რეაბილიტაციის დასრულების შემდეგ, 500 მ2 ტროტუარზე დაიგება ასფალტი. ასევე, საგზაო სამუშაოების ფარგლებში, მოეწყო 466 გ/მ ბორდიური. ძმები გარიშვილების ქუჩის კაპიტალური რეაბილიტაციის პროექტის ღირებულება 157 600 ლარია. სამუშაოები ნაძალადევის რაიონის გამგეობის დაკვეთით ხორციელდება.

პარალელურად, საგზაო ინფრასტრუქტურის მოწესრიგება მიმდინარეობს საყვირის, მახინჯაურის, ხევისუბნის, რკინიგზის, სანერგეს, ბუაჩიძის ქუჩებზე. ასევე, გზის საფარის რეაბილიტაცია ხდება თემქის მე-3 მ/რ, მე-5 კვარტალში და გურამიშვილის №70-ში. მიწისქვეშა კომუნიკაციების შეკეთება კი ამ ეტაპზე 3 ქუჩაზე მიმდინარეობს: ქსოვრელზე, ნაქალაქევსა და წაღვერზე. აღნიშნულ ობიექტებზე წყლისა და კანალიზაციის ქსელის რეაბილიტაციის შემდეგ, ნაძალადევის რაიონის გამგეობის დაკვეთით, კაპიტალური საგზაო სამუშაოები დაიწყება და ასფალტი დაიგება.