„უფლის წყალობით და თქვენი ლოცვა-კურთხევით მშვიდობით დავბრუნდით გერმანიიდან“, - ამ სიტყვებით მიმართა სრულიად საქართველოს კათოლიკოს-პატრიარქმა სამების ტაძარში შეკრებილ მრევლს.

„ექიმებმა ჩაატარეს მკურნალობა, ძალიან რთული მდგომარეობა იყო გულზე. მადლობა უფალს, რომ ყველაფერი კარგად დამთავრდა. ახლა მოვემზადოთ ილიაობისთვის. დალოცვილი იყავით, გახარებული იყავით თქვენ და სრულიად საქართველო", - ბრძანა კათოლიკოს-პატრიარქმა.

უწმინდესი და უნეტარესი გერმანიაში სამკურნალოდ 14 ივლისს გაემგზავრა. მას უცხოეთში გეგმიური გამოკვლევები და სარეაბილიტაციო მკურნალობა ჩაუტარდა, თუმცა კორონაროგრაფიით გამოიკვეთა, რომ გულის სისხლძარღვებზე დამატებითი ინვაზიური სამკურნალო ჩარევა იყო საჭირო. პროცედურამ წარმატებით ჩაიარა.