სრულად გაზიფიცირებულ დასახლებათა ჩამონათვალს 7 სოფელი დაემატა. საქართველოს ენერგეტიკისა და წყალმომარაგების მარეგულირებელი ეროვნული კომისიის 24 ივლისის სხდომაზე მიღებული გადაწყვეტილების შედეგად გაიზარდა იმ სოფლების ჩამონათვალი, სადაც ბუნებრივი გაზის ქსელზე ახალი მომხმარებლის მიერთება 400 ლარადაა შესაძლებელი.

კერძოდ, ცვლილებები შევიდა „გაზიფიცირებულ დასახლებათა ჩამონათვალის დამტკიცების შესახებ“ საქართველოს ენერგეტიკისა და წყალმომარაგების მარეგულირებელი ეროვნული კომისიის 2014 წლის 3 ნოემბრის #43/1 დადგენილებაში, რომლის მიხედვით, ჩამონათვალს დაემატა შემდეგი სოფლები: ქობულეთის მუნიციპალიტეტის სოფელი ოჩხამური, გორის მუნიციპალიტეტის სოფელი ტირძნისი და კასპის მუნიციპალიტეტის სოფლები - სამთავისი, თოგოიანი, თეზი, ბარნაბიანთკარი და სასირეთი. მთლიანობაში სოფლების რაოდენობა 614-ს შეადგენს.

სრულად გაზიფიცირებულ დასახლებათაჩ ამონათვალს, რომლებსაც ბუნებრივი გაზის ქსელზე ახალი მომხმარებლის მიერთების 400 ლარიანი ტარიფი შეეხება, ახალი გაზიფიცირებული დასახლებები ეტაპობრივად დაემატება.