"ეს ზრდა მცირედი ამოსუნთქვის საშუალებაა" - "ენერგო პრო ჯორჯია" სემეკის გადაწყვეტილებაზე

საზოგადოება - 15:52, 23 Jul, 2015

2358

სემეკ-ის დღევანდელი გადაწყვეტილებით უკმაყოფილოა ენერგო-პრო ჯორჯია. კომპანიის გენერალური დირექტორის მიხეილ ბორცვაძის თქმით, ტარიფის ზრდა 4.8 თეთრით უნდა მომხდარიყო.

თუმცა ბორცვაძის განმარტებით, დღევანდელი გადაწყვეტილება მათ მცირედი ამოსუნთქვის საშუალებას მისცემს.

"ვფიქრობთ და ვეჭვობთ, რომ ჩვენი პროგნოზი გამართლდება. ჩვენს მიერ იყო უფრო მეტი ზრდა მოთხოვნილი. ეს ზრდა უკვე არის მცირედი ამოსუნთქვის საშუალება, მაგრამ, თუ ჩვენ ელექტროენერგია ისევ უფრო ძვირი დაგვიჯდა, ვიდრე ახლა ჩაჯდა ტარიფში, ისევ სარეაბილიტაციო სახსრებით გადაიფარება, ისევ გამრიცხველიანების სახსრებით უნდა მიიმართოს ამ მიმართულებით, ისევ ხარისხს დაეტყობა და რა თქმა უნდა, იქნება აბონენტის პრობლემა. ამ გადაწყვეტილებით ვინც 100 კილოვატამდე მოიხმარს ელექტროენერგიას, 9-ის ნაცვლად 13 ლარის გადახდა მოუწევს. ჩვენ კი ვითხოვდით, რომ დაახლოებით 14 ლარამდე გაზრდილიყო ეს თანხა“, - განაცხადა ბორცვაძემ.

„სემეკის“ დღევანდელი გადაწყვეტილებით 1 აგვისტოდან ელექტროენერგიის სამომხმარებლო ტარიფი 3.95 თეთრით გაძვირდება.

დღევანდელ საჯარო სხდომაზე საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ, „ენერგო პრო ჯორჯიასთვის“ ელექტროენერგიის მოხმარების ტარიფის კორექტირებაზე იმსჯელა. შესაბამისად, დღევანდელი გადაწყვეტილებით სამომხმარებლო ტარიფის გაძვირება მხოლოდ ენერგო პრო ჯორჯიას აბონენტებს შეეხება. ახალი ტარიფი მიმდინარე წლის დეკემბრის ჩათვლით იმოქმედებს.