თბილისის მერიის ეკოლოგიის და გამწვანების საქალაქო სამსახურის ინიციატივით სასტუმრო „თბილისი მარიოტში“ თბილისის გარემოსდაცვითი სტრატეგია 2015-2020-ის განსახილველად სამუშაო შეხვედრა გაიმართა. შეხვედრა USAID-ის კავკასიის ოფისის მხარდაჭერით ჩატარდა.

ეკოლოგიისა და გამწვანების საქალაქო სამსახურის უფროსმა ბიძინა გიორგობიანმა სიტყვით მიმართა შეხვედრის მონაწილეებს და ვრცლად ისაუბრა თბილისის გარემოსდაცვითი სტრატეგია 2015-2020-ის მომზადების მნიშვნელობაზე. „აღნიშნული სტრატეგია იქნება ერთგვარი სახელმძღვანელო დოკუმენტი იმისთან დაკავშირებით, თუ როგორ უნდა მოგვარდეს დედაქალაქში ეკოლოგიური პრობლემები და გაუმჯობესდეს ურბანული გარემოს დაცვა. სტრატეგია საშუალებას მოგვცემს ზუსტად განვსაზღვროთ კონკრეტული ქმედებები გარემოსდაცვითი პრობლემების გადასაჭრელად, ამიტომ საჭიროა მისი დროულად მომზადება და საკრებულოში დასამტკიცებლად გატანა“ - განაცხადა ბიძინა გიორგობიანმა. მისი თქმით, სტრატეგიის მომზადების პროცესში გარემოსდამცველებისა და დაინტერესებული მხარეების ფართო ჩართულობა და მათი მოსაზრებებისა თუ შენიშვნების გაზიარება მნიშვნელოვანია გარემოს ცალკეულ კომპონენტებზე სრულფასოვანი შეფასების მოსამზადებლად.

შეხვედრაზე საუბარი შეეხო სტრატეგიის დამტკიცების შემდეგ მერიის ეკოლოგიისა და გამწვანების სამსახურის ფუნქციის გაძლიერებასა და სამსახურის მიერ ეფექტური გარემოსდაცვითი პოლიტიკის გატარების აუცილებლობას.

თბილისის გარემოსდაცვითი სტრატეგია 2015-2020-ის განხილვის მიზანს წარმოადგენს თბილისის გარემოს მდგრადი და ინტეგრირებული მართვის ისეთი სისტემის ჩამოყალიბება, რომელიც უზრუნველყოფს თბილისში გარემოს მდგომარეობის გაუმჯობესებას, ადგილობრივ დონეზე გარემოსდაცვითი გამოწვევების განსაზღვრის, პრობლემების გადასაჭრელად საუკეთესო მიდგომების შემუშავების, გარემოსდაცვითი საკითხების დაგეგმვის და შემდგომი განხორციელების გზით და ასევე, გადაწყვეტილებების მიღების პროცესში ადგილობრივი ხელისუფლებისა და საზოგადოების ერთობლივი ჩართულობის უზრუნველყოფის მეშვეობით.

შეხვედრაში მონაწილეობდნენ თბილისის მერიის ეკოლოგიისა და გამწვანების, ეკონომიკური პოლიტიკისა და კეთილმოწყობის საქალაქო სამსახურების წარმომადგენლები, გარემოსა და ბუნებრივი რესურსების დაცვისა და სხვა სამინისტროების თანამშრომლები, ასევე დაინტერესებული მხარეები, გარემოსდაცვითი არასამთავრობო ორგანიზაციები და კერძო სექტორის წარმომადგენლები.