მოსახლეობას შესაძლოა დენი გრაფიკით მიეწოდოს - ენერგოკომპანიები ქვეყანას ტოვებენ

საზოგადოება - 16:42, 22 Jul, 2015

16897

"ენერგო-პრო ჯორჯიას" გენერალური დირექტორის მოადგილე მიხეილ ბოცვაძე არ გამორიცხავს, რომ ნოემბერ-დეკემბერში რეგიონის მოსახლეობას ელექტროენერგია გრაფიკით მიეწოდოს.

ამის შესახებ მან სემეკის სხდომის დასრულების შემდეგ განაცხადა, სადაც თბოელექტროსადგურებისთვის გაძვირებული ტარიფი დადგინდა.

ბოცვაძე, რომელიც სხდომაზე "ენერგო-პრო ჯორჯიას" შვილობილ კომპანია "ჯიფაუერს" წარმოადგენდა, გადაწყვეტილებას უარყოფითად აფასებს.

"ეს იქნება კიდევ ერთი წარმატებული ენერგოკომპანიის დანგრევა. უკვე გაჩერების პირას ვართ და კრიზისში ვართ უკვე იმ დონეზე, რომ ვცდილობთ დავტოვოთ ქვეყანა. დღეს დადგა რეალობა, როცა "ჯიფაუერისთვის" ელექტრონერგის გამომუშავების თვითღირებულება არის 10,5 თეთრი, ხოლო ბაზარს უნდა მიაწოდოს 7,3 თეთრად. სახელმწიფომ მოგვაწოდოს მაშინ ზუსტად იგივე ფასში ელექტროენერგია, რაშიც ყიდულობს. ჩვენი ზარალი არის ათობით მილიონი და ჩვენ ამას ვერ გავუძლებთ. თუ ასე გაგრძელდა, ნოემბერ-დეკემბერში გვექნება გრაფიკი“, - აღნიშნა ბორცვაძემ.

დღეიდან ელექტროენერგია, რომელსაც თბოელექტროსადგურები კერძო კომპანიას მიჰყიდიან, რამდენიმე თეთრით მოიმატებს. გადაწყვეტილება ცოტა ხნის წინ სემეკმა მიიღო.