ბათუმის ხელოვნების ცენტრში პ. მასკანის „სოფლის ღირსება“ აჟღერდება

კულტურა - 23:08, 19 Jul, 2015

2019

ბათუმის ხელოვნების ცენტრში, 23 ივლისს, პ. მასკანის ოპერას "სოფლის ღირსება"-ს წარმოადგენენ. სპექტაკლში იმღერებენ ბათუმის საოპერო სტუდიის სოლისტები-ინგა ჯახუტაშვილი, ირაკლი კახიძე, ოთარ ნაკაშიძე, ეთერ ხალვაში, ტატიანა ჯიქია. ბათუმის მისუკალური ცენტრის სიმფონიურ ორკესტრს და კაპელას უდირიჟორებს მაესტრო ზაზა აზმაიფარაშვილი.
პიეტრო მასკანის ოპერის „სოფლის ღირსების“ შექმნას გარკვეული წინაპირობა ჰქონდა. მილანელმა გამომცემელმა სონზონიმ ერთმოქმედებიანი ოპერის დასაწერად კონკურსი გამოაცხადა. მასში მონაწილეობის მისაღებად პიეტრო მასკანიმ ოპერა „რატკლიფის“ წერა დროებით მიატოვა და დაიწყო მუშაობა ოპერა „სოფლის ღირსების“ სიუჟეტზე, რომელიც კომპოზიტორს მანამდეც იზიდავდა. „სოფლის ღირსება“ იტალიელი მწერლის ჯოვანი ვერგას ნოველაა, რომელიც 1889 წელს გამოქვეყნდა და დიდი პოპულარობით სარგებლობდა წარმატებული ინსცენირების გამო. ნაწარმოებში მოვლენები ვითარდება ერთი დილის განმავლობაში, რამაც ძალზე მიიზიდა კომპოზიტორი.
ოპერის ლიბრეტოს შექმნაზე მუშაობდნენ ტარჯონი-ტოცეტი და მენაში. დრამის ორ მოქმედებას აერთიანებს სიმფონიური ინტერმეცო, რომელმაც შემდგომში ფართო აღიარება მოიპოვა და დღესაც ძალზედ ხშირად სრულდება დამოუკიდებელი სიმფონიური მინიატურის სახით. აღსანიშნავია, რომ კონკურსზე წარმოდგენილ 70 ოპერას შორის „სოფლის ღირსებამ“ პირველი პრემია მოიპოვა.
„სოფლის ღირსების“ პრემიერას 1890 წლის 17 მაისს რომში ტრიუმფალური წარმატება ხვდა წილად, რის შემდეგაც ოპერა მრავალ ქვეყანაში დაიდგა. თბილისში ეს ოპერა პირველად 1891 წელს, მსოფლიო პრემიერიდან ერთი წლის შემდეგ დაიდგა და მას მერე მუდმივად ჟღერს თეატრის რეპერტუარში.
ქართული მუსიკალური თეატრების სცენებზე სხვადასხვა დროს მღეროდნენ ამ სპექტაკლში ევროპელი და ქართველი ოპერის მეგა-ვარსკვლავები, მაგრამ ქართველი მსმენელისთვის დაუვიწყარია ლეგენდარული ცისანა ტატიშვილი და ნოდარ ანდღულაძე, რომლებსაც ამ ოპერაში მონაწილეობით და უმაღლესი კლასის შესრულებით, არაერთხელ გაუოცებია საზღვარგარეთელი მსმენელიც. ბათუმში „სოფლის ღირსება“ 2012 წელს დაიდგა, საოპერო სტუდიის სამხატვრო ხელმძღვანელის მარიამ ჯახუტაშვილის სურვილითა და მონდომებით, ბათუმის ახალგაზრდული დასი „სოფლის ღირსებით“ თბილისშიც იყო ჩამოსული და „სოფლის ღირსება“ შ. რუსთაველის სახელობის სახელმწიფო აკადემიური თეატრის სცენაზე იმღერეს. დედაქალაქის მუსიკალური საზოგადოება აღაფრთოვანა ახალგაზრდა სოლისტების ოსტატობამ რეჟისორ გიორგი თავაძის ბრწყინვალე დადგმაში.