თუ პრეტენზიები რეალურია, მაშინ ბენზინი ხვალიდან საგრძნობლად უნდა გაიაფდეს- რომან გოცირიძე

ბიზნესი & ეკონომიკა - 23:23, 18 Jul, 2015

3432

ბიუჯეტის კორექტირებასთან დაკავშირებით ეკონომიკური განვითარების ცენტრის ხელმძღვანელი, რომან გოცირიძე, ამბობს, რომ „ბიუჯეტი არ შემცირებულა არც ერთი თეთრით“.

ამის შესახებ გოცირიძემ რუსთავი2-თან ისაუბრა.

„ცუდი ამ პროცესში არის ის, რომ ბიუჯეტში რეალურად მოხდება ხარჯების შემცირება. ეს არის ერთი მუხლიდან მეორე მუხლში ხარჯების გადატანა. ანუ ბიუჯეტი წარმოადგენს საფრთხეს მომავალი სავალუტო თუ ეკონომიკური სტაბილურობისათვის,“ - აცხადებს რომან გოცირიძე.

გოცირიძემ ასევე შეაფასა ნავთობკომპანიების დაჯარიმების საკითხიც და თქვა, რომ ანტიმონოპოლიური სამსახურის მოქმედებები ბევრ კითხვებს აჩენს.

„ამ მასშტაბის დაჯარიმებას არავინ დაიჯერებს. არ ვამბობ, რომ ნავთობკომპანიები არ სცოდავდნენ, მაგრამ 55-მილიონიანი ჯარიმა მეტად არასერიოზულად გამოიყურება. ამაში შეიძლება სხვადასხვა ქვეტექსტები ვეძებოთ,“ - აცხადებს გოცირიძე.

ის ასევე ამბობს, რომ ანტიმონოპოლიური სამსახურის მონაცემები უნდა გასაჯაროვდეს.

გოცირიძეს მიაჩნია, რომ სასამართლო პერსპექტივა არა აქვს და პროცესმა შეიძლება პოლიტიკური სახე მიიღოს, რადგან არ გამორიცხავს, გარიგება მოხდეს და ნავთობკომპანიებმა სახე შეუნარჩუნონ ხელისუფლებას.

რომან გოცირიძე ასევე მიიჩნევს, რომ, თუ ანტიმონოპოლიური სამსახურის პრეტენზიები რეალურია, მაშინ ბენზინი ხვალიდან საგრძნობლად უნდა გაიაფდეს, რისიც გოცირიძეს არ სჯერა.