„წაშალე მეგობრები“ - ფილმი-ტრილერი სოციალურ ქსელში ურთიერთობებზე

კულტურა - 12:23, 18 Jul, 2015

2559

ქართველი რეჟისორის ლევან გაბრიაძის და პროდიუსერ ტიმურ ბეკმამბეტოვის ერთობლივმა დესკტოპ ტრილერმა -„წაშალე მეგობრები“ მსოფლიო ეკრანები წარმატებით მოიარა და ახლა მას ქართველი მაყურებელი, „კავეაში“, „ამირანში“, „რუსთაველსა“ და „აპოლოში“ აფასებს. ფილმის ბიუჯეტი 1 000 000 დოლარს შეადგენს,ხოლო მსოფლიო გაქირავებიდან მიღებულმა შემოსავალმა უკვე 50 000 000 დოლარს გადააჭარბა. „წაშალე მეგობრები“ გადაღებულია ინოვაციურ ჟანრში და მოქმედება მთავარი მოქმედი გმირის კომპიუტერის ეკრანზე ვითარდება, რომელიც მეგობრებს “SKYPE” და “FACEBOOK”-ის მეშვეობით ეკონტაქტება.
ფილმის თანაპროდიუსერია ჯეისონ ბლუმი, რომელმაც შექმნა ისეთი პროექტები, როგორებიცაა პარანორმალური მოვლენების ფრანჩიზა; ასტრალის ტრილოგია და სხვა საშინელებათა ჟანრის ყველაზე პოპულარული ფილმები. ქართველი რეჟისორის ნამუშევარმა „წაშალე მეგობრებმი“ კანადაში კინოფესტივალზე „FANTASIA” სპეციალური ჯილდო მიიღო ნომინაციაში „ყველაზე ინოვაციური ფილმი“.
2015 წლის მარტში ფილმი „წაშალე მეგობრები“ აჩვენეს კინოფესტივალზე „SOUTH BY SOUTH WEST” (ტეხასი, აშშ), ხოლო 4 აპრილს ფილმი წარადგინეს მსოფლიოში ცნობილ სამეციერო-ფანტასტიკური და კომიქსების ფესტივალზე „WONDERCON”(კალიფორნია, აშშ) ჩვენებამ პოზიტიური გამოხმაურების ახალი ტალღა გამოიწვია, არა მხოლოდ მაყურებლების, არამედ კინოკრიტიკოსების მხრიდან.