„სოკარი“ კონკურენციის სააგენტოს გადაწყვეტილების გასაჩივრებას გეგმავს

საზოგადოება - 14:22, 17 Jul, 2015

1334

„სოკარ ჯორჯია პეტროლეუმის“ განცხადებით, კომპანიას არ დაურღვევია „კონკურენციის შესახებ“ კანონის არც ერთი მოთხოვნა" და კომპანიის დაჯარიმების თაობაზე კონკურენციის სააგენტოს გადაწყვეტილების სასამართლოში გასაჩივრებას გეგმავს.

როგორც კომპანიაში აცხადებენ, „სოკარ ჯორჯია პეტროლეუმი“ დაწყებული 2014 წლის ნოემბრიდან აქტიურად თანამშრომლობს კონკურენციის სააგენტოსთან, პასუხი გასცა ყველა დასმულ შეკითხვას და მიაწოდა ყველა დოკუმენტი მოთხოვნილებისამებრ, კონკურენციის სააგენტოს ასევე წარედგინა დოკუმენტალურად დასაბუთებული მყარი არგუმენტები.

"სამწუხაროა, რომ არ მოხდა მათი გათვალისწინება და კომპანიას წარედგინა სერიოზული ჯარიმა. ვაცხადებთ, რომ კომპანია „სოკარ ჯორჯია პეტროლეუმს“ არ დაურღვევია „კონკურენციის შესახებ“ კანონის არც ერთი მოთხოვნა. ბრალდება, რომ „სოკარ ჯორჯია პეტროლეუმი“ ნავთობპროდუქტების სასაქონლო ბაზარზე ხელოვნურ ბარიერებს ქმნიდა, რომლითაც იზღუდებოდა წარმოება და მოქმედებდა შეთანხმებული ფასები, მოკლებულია სამართლებრივ საფუძველს. საქართველოში საქმიანობის დაწყებიდან „სოკარ ჯორჯია პეტროლეუმი“ მოქმედებდა და მოქმედებს ქვეყანაში არსებული პოლიტიკის, კანონმდებლობის და ნორმატიული აქტების შესაბამისად. კომპანია არასდროს არ იყო ორიენტირებული რაიმე განსაკუთრებულ ზემოგებაზე, რასაც ადასტურებს ის სახელმწიფოებრივად მნიშვნელოვანი პროექტები, რომლებიც განხორციელდა ჩვენი ქვეყნის მასშტაბით. ბიუჯეტში შეტანილია 1 მილიარდ 260 მილიონი ლარი, დასაქმებულია 1500 ადამიანი, სპონსორობას უწევს სხვადასხვა სპორტულ ფედერაციებს, ინტელექტუალურ თამაშებს, ხელოვნების დარგებს და ა.შ. კიდევ ერთხელ ვაცხადებთ, რომ სამწუხაროა ასეთი შეფასება და ვაფიქსირებთ, რომ არ ვეთანხმებით კონკურენციის სააგენტოს გადაწყვეტილებას და საკუთარი ინტერესების დაცვას გავაგრძელებთ ცივილური სამართლებრივი გზით", - ნათქვამია "სოკარ ჯორჯია პეტროლეუმის" განცხადებაში.

კომპანიაში ასევე დადებითად აფასებენ საქართველოში კონკურენციის სააგენტოს შექმნას და მის საქმიანობას.

"ყველა ჩვენთაგანი ვალდებულია ითანამშრომლოს სააგენტოსთან და შეასრულოს კანონით დადგენილი მოთხოვნები", - ნათქვამია "სოკარ ჯორჯია პეტროლეუმის" განცხადებაში.