ივლიტა ჯიბუტის დაბადების დღეზე ჩოხატაურში მისი სახელობის ბიბლიოთეკა გაიხსნება

საზოგადოება - 19:14, 16 Jul, 2015

2045

19 ივლისს, კვირას, 16 საათზე, ჩოხატაურში, თბილისის სტიქიის დროს დაღუპული ივლიტა ჯიბუტის დაბადების დღეზე, მისი სახელობის ბიბლიოთეკა სიმბოლურად იხსნება. ბიბლიოთეკა მედიასახლ “გურია ნიუსისა” და საქართველოს პარლამენტის ეროვნული ბიბლიოთეკის ინიციტივით კეთდება. ბიბლიოთეკაში ახალგაზრდებს ცოდნის გაღრმავების, ინტერნეტრესურსთან შეუზღუდავი წვდომის, ღია საზოგადოებაში ინტეგრაციის, ახალ ინიციატივებზე მსჯელობის შესაძლებლობა ექნებათ.

ჩოხატაურის ახალგაზრდული საკრებულოს ინიციატივით ჩოხატაურის მუნიციპალიტეტში თბილისში მომხდარი სტიქიის დროს დაღუპულ ივლიტა ჯიბუტის ბიბლიოთეკის დასახმარებლად საქველმოქმედო აქცია-საღამო გაიმართა. ახალგაზრდული საკრებულოს წევრებმა საღამოს ორგანიზება საკუთარი ძალებით შეძლეს, შემოსული თანხა კი ბიბლიოთეკის ანგარიშზე გადაირიცხა.

ახალგაზრდული საკრებულოს წევრებმა მადლობა გადაუხადეს ყველა იმ ადამიანს, ვინც უანგაროდ მიიღო მონაწილეობა საქველმოქმედო საღამოში.

"მადლობა გვინდა გადავუხადოთ კულტურის სახლის დირექტორს, ქალბატონ თამარ კეკელიძეს, რომელმაც უდიდესი წვლილი შეიტანა ამ საღამოს ჩატარებაში. ჩოხატაურის ახალგაზრდული საკრებულო 19 ივლისს, ივლიტა ჯიბუტის დაბადების დღეს, „ადამიანი კანონი თავისუფლებას“ აქციის „1 წიგნი ივლიტას ბიბლიოთეკას“ ფარგლებში სხვა ახალგაზრდულ საკრებულოებთან ერთად წიგნებს გადასცემს ბიბლიოთეკას. მოკლე ხანში დაიწყება ახალ პროექტებზე მუშაობა, რომელიც ვფიქრობთ ყველა თაობის წარმომადგენლისათვის სასიკეთო იქნება“ - განაცხადა ჩოხატაურის ახალგაზრდული საკრებულოს თავმჯდომარემ გვანცა ბარამიძემ.