„სიცოცხლე აღარ მინდა, მაგრამ ნიკუშა, როგორ დავტოვო“

„სიცოცხლე აღარ მინდა, მაგრამ ნიკუშა, როგორ დავტოვო“ - ნანა ლეჟავა

საზოგადოება - 13:51, 16 Jul, 2015

15095

„გულმკერდშიც გამეხსნა ჭრილობები, იქედანაც ჩირქი მდის. რას ვუძლებ მეც არ ვიცი, ამ ტკივილებმა ძალიან დამღალა, სიცოცხლე აღარ მინდა, მაგრამ ნიკუშა, როგორ დავტოვო“ - ამბობს „ნიუპოსტთან“ ნანა ლეჟავა. მასთან დაკავშირება სოციალურ ქსელში მის მიერვე გავრცელებულმა ძიმე შინაარსის წერილმა გადაგვაწყვეტინა. გაუსაძლის ტკივილსა და გახსნილ ჭრილობებს, უსახსრობა და ცერებრალურ დამბლიან, უსინათლო შვილზე ფიქრიც ემატება, რომელიც როგორც თავად ამბობს ნახევრად მშიერი ჰყავს. ნანა ლეჟავა დახმარებას საზოგადოებას და ტელეწამყვანებს სთხოვს.

ნანა ლეჟავა: „როდესაც გულის ოპერაცია გავიკეთე და ნაკერები მომხსეს მკერდიდან რამდენიმე დღეში წამომივიდა ჯერ სითხე და მერე ჩირქი, ღუდურშაურში გამაგზავნეს ჩირქოვან ქირურგთან. იქ რომ მივედი ფეხები უკვე დამძიმებული და დასიებული მქონდა, ძალიან ცუდად ვიყავი. მითხრეს 70%-ს მთავრობა აფინანსებს, 30% თქვენ უნდა გადაიხადოთ, სანამ ამ თანხას არ შემოიტანთ ოპერაციას ვერაფრით გაგიკეთებთო. ეს 678 ლარს შეადგენდა. ვერ გადავიხადე და უარი ვთქვი. საიდან უნდა მომეტანა ეს თანხა. ვინაიდან მერიამ გულის 30 % დამიფინანსა ეს ოპერაცია უკვე არ დააფინანსა.
მეორე დღეს ძალიან ცუდად გავხდი და სასწრაფომ ღუდუშაურში გადამიყვანა, იძულებულები გახდნენ, რომ გაეკეთებინათ ოპერაცია. 15 დღე ვიყავი რეანიმაციაში, უკიდურესად მძიმედ. ამის შემდეგ სახლში გამომწერეს. მესამე დღეს ისევ ცუდად გავხდი და სასწრაფოთი მოვხვდი ნეო ჰოსპიტალში. იქ არაფერი მახსოვს. ისევ ოპერაცია დამჭირდა. ამას დაერთო ის რომ ორივე ფეხზე გამიჩნდა წითელი ქარი. სახლში გამოწერილს ჭრილობები გამეხსნა, არ მიხორცდებოდა და დამჭირდა ისევ ოპერაცია. რომ მკვდარი ქსოვილები ამოეღოთ. ისევ ნეო ჰოსპიტალში მოვხვდი სასწრაფოთი. იქ ქირურგებმა ერთმანეთს უთხრეს ეს გია თავბერიძის პაციენტია და ჩვენთან რა უნდაო. ნეოჰოსპიტალმა გამაჩერა ნახევარი საათი, დიაბეტიანი, წითელქარიანი და გამომიშვა. მოსაცდელში მომლოდინე ადამიანებთან ერთად ვიჯექი და ვფიქრობდი უკან სახლში რით უნდა დავბრუნებულიყავი.
ამის შემდეგ ინგოროყვაში მოვხვდი. გამოჩნდა ღვთისნიერი გადაიხადა 411 ლარი და გამიკეთდა ოპერაცია. ვიწექი რეანიმაციაში 12 დღე, ამ 12 დღის განმავლობაში ვიხვეწებოდი, ნაწოლები მაქვს, ძალიან მაწუხებს, მიშველეთ ან სახლში გამიშვით-მეთქი. ჩემს დისშვილს, მოატანინეს 10 ლარიანი მალამო. არ წამისვეს. მეცამეტე დღეს კატეგორიულად მოვითხოვე სახლში გაშვება. რადგან გონებრივად უკვე ვირყეოდი. სახლში ძვალზე ტყავგადაკრული დავბრუნდი. შეცვლილი და შეშლილი სახით, რაც მქონდა ამ მალამოს დადება დავიწყე. არ მიშველა, პირიქით გამაგრდა. მერე ძვირადღირებული ხსნარის სეძენა მოგვიხდა და მიშველა...
ამ 7 წლის განმავლობაში ერთამანეთის მიყოლებით 4 ნარკოზი მაქვს გაკეთებული. ახლა ჩემთვის აუცილებელია, საავადმყოფო და გამოკვლევები. ანტიბიოტიკებს მე ვერანაირად ვიყიდი. მათ გარეშე კი ანთებითი პროცესი არ ცხრება.
ვის არ მივმართე თხოვნით. ქალბატონი ინგა გრიგოლია დახმარებას შემპირდა, ეკა ხოფერიაც. შარშაწინ როცა წერილი მივწერე, ხომ არ დაგავიწყდით ქალბატონო ეკა-მეთქი, როგორ შეიძლება ქალბატონო ნანა თქვენი დავიწყებაო. მაინც იმედით ვარ... ორივეს ყოველთვის ძალიან დიდ პატივს ვცემდი.
ახლა ძალიან ჩავარდი, ვეღარც ქირას ვიხდი. ნახევრადმშივრები ვართ. ჩემი ქალიშვილი ვერ მუშაობს, ჩვენ გვივლის მე და ნიკოლოზს. ნიკოლოზი 18 წლის არის , ცერებლარული დამბლით, უსინათლო. ძალიან მინდა ფეხზე დავდგე. ვიმუშაო და აღარ ვიმათხოვრო.

საკონტაქტო ტელეფონი 555565183
მიმღების IBAN ანგარიშის # GE25 BR07 0000 3601 0004 38
მიმღების ბანკი ს.ს. ბანკი „რესპუბლიკა“
ბანკის BIC კოდი: REPLGE22
საქველმოქმედო ნომერი 09070511 - ამ ნომერზე დარეკვა შეუძლია ბილაინის, მაგთის და ჯეოსელის აბონენტებს.