,,შემცირდეს ბიუროკრატიული აპარატის შენახვის ხარჯები“ - სებ-ის რეკომენდაცია ბიუჯეტთან დაკავშირებით

ბიზნესი & ეკონომიკა - 14:30, 15 Jul, 2015

1513

ეროვნული ბანკის პრეზიდენტის - გიორგი ქადაგიძის თქმით სახელმწიფო აპარატის და ბიუროკრატიის შენახვა ქვეყნის ბიუჯეტს იმაზე მეტი უჯდება, ვიდრე ეს საქართველოს ეკონომიკას შეუძლია რომ აიტანოს. ქადაგიძის თქმით, ბიუჯეტთან დაკავშირებით სებ-ის რეკომენდაცია მიმდინარე და ბიუროკრატიის ხარჯების უფრო მეტად შემცირებაა.

ქადაგიძის თქმით, სებ-ი ბიუჯეტის კორექტირებას მიესალმება, თუმცა აღნიშნული ცვლილებები საკმარისი არაა:

"ჩვენი აზრით, წარმოდგენილი ცვლილებები საკმარისი არ არის. ის არ ასახავს იმ გამოწვევებსა და რეალობას, რაც ქვეყანაშია. ჩვენი რეკომენდაცია არის მიმდინარე და ბიუროკრატიის ხარჯების უფრო მეტად შემცირება, რაც დაეხმარება როგორც ზოგადად, ეკონომიკურ ზრდას, ასევე, რა თქმა უნდა, ლარის გაცვლით კურსს. უფრო მარტივ ენაზე რომ ვთქვათ, დღეს ჩვენ უფრო დიდი და მდიდარი სახელმწიფო აპარატი და ბიუროკრატია გვაქვს, ვიდრე ჩვენს ეკონომიკას შეუძლია ეს აიტანოს და ეს. რა თქმა უნდა, აისახება ყველა პარამეტრზე, ამიტომ ჩვენი მთავარი რჩევა, რომელიც ბიუჯეტთან დაკავშირებით ეროვნული ბანკის დასკვნაშია, არის ის, რომ შემცირდეს მიმდინარე და ბიუროკრატიის აპარატის შენახვის ხარჯები" - განაცხადა ქადაგიძემ. როგორც სებ-ის პრეზიდენტმა აღნიშნა საქართველო მნიშვნელოვანი საგარეო შოკის პირობებში იმყოფება და ამიტომ ბიუჯეტი უნდა ასახავდეს რეგიონში არსებულ რეალობას. ქადაგიძის განცხადებით როდესაც მცირდება შემომავალი ფულადი ნაკადები, როგორიცაა ექსპორტი, ტურიზმი და გზავნილები, ლარის კურსზე გავლენის მქონე მთავარი იარაღი არის ფისკალური პოლიტიკა.

"თუ ჩვენ გვინდა, რომ დადებითი გავლენა მოვახდინოთ ლარის კურსზე, მაშინ როდესაც სხვა შემომავალი ნაკადები მცირდება, მაშინ მთავარი დოკუმენტი და ამის მთავარი იარაღი არის ფისკალური პოლიტიკა, ანუ ბიუჯეტი. დღევანდელი ბიუჯეტი ამას არ ითვალისწინებს", - განაცხადა ქადაგიძემ.