„პრორუსული პროპაგანდა... ეს იყო ამაზრზენი რამ...“ - გიორგი ჩიტაური „რეაქციის“ეთერს აკრიტიკებს

საზოგადოება - 16:26, 11 Jul, 2015

3254

მომღერალი, „ლეიბორისტული პარტიის“ წევრი გიორგი ჩიტაური „რეაქციის“ გუშინდელ გადაცემას აკრიტიკებს.

მისი თქმით, გადაცემის უმეტესი ნაწილი ნინო ბურჯანაძის მოსკოვში ვიზიტს დაეთმო. მომღერალი თვლის, რომ ტელევიზიებში რუსული პროპაგანდა არ უნდა ხდებოდეს.

„გუშინდელი გადაცემა ნინო ბურჯანაძის ვიზიტს მიეძღვნა. პირველ რიგში მინდა ვთქვა, რომ ქალბატონ ბურჯანაძეს ძალიან მოკლე მეხსიერება აქვს და დაავიწყდა ბევრი რამ რაც რუსეთმა ჩვენს ქვეყანას გაუკეთა, თუნდაც 2008 წელს. მაინტერესებს ბურჯანაძე რა პასუხს გასცემს იმ ხალხის მშობლებს, ვინც ჩვენი ტერიტორიული მთლიანობისთვის თავი გაწირეს. გუშინდელ გადაცემაში ბურჯანაძესთან ერთად სტუდიაში ბრძანდებოდნენ მისი მოკავშირეები კახა ძაგანია და სოსო შატბერაშვილი და მათი სულიერი მოკავშირე ემზარ კვიციანი. სამწუხაროა, რომ გადაცემაში ჰყავთ მიწვეული ისეთი ადამიანები ვისაც სიტყვა არ ეთქმით საზოგადოებაში. უკმაყოფილო ვარ ამ გადაცემით, მინდა სწორედ გაიგოს ყველამ. არა იმიტომ, რომ იქ არაპროფესიონალიზმი იყო, მათი გადასაწყვეტია ვის მიიწვევენ და ვის არა, მაგრამ უნდა გაითვალისწინონ, რომ ისეთი ადამიანების მიწვევა, ვინც საზოგადოებაში არანაირი გავლენით არ სარგებლობენ და პროპაგანდას უწევენ პრორუსულ აზროვნებას, მათ გადაცემაზე უარყოფითად იმოქმედებს. პრორუსული ძალების პროპაგანდა არ უნდა ხდებოდეს. უფრო მეტი პრობლემა აქვს საზოგადოებას. ეს იყო ამაზრზენი რამ ჟურნალისტიკაში...“, - აცხადებს გიორგი ჩიტაური.