"თემოს გაჩენიდან პირველი კვირების განმავლობაში, გიორგი ღამღამობითაც მეხმარებოდა ბავშვის მოვლაში"

საზოგადოება - 17:34, 10 Jul, 2015

7358

პატარა თემო ჯერ სულ რამდენიმე თვისაა და როგორც პირველმა ლედიმ ჟურნალისტებს გაუმხილა პრეზიდენტიც აქტიურადაა ჩართული შვილის გაზრდის პროცესში.

მაკა ჩიჩუა: ჩვენი ცხოვრება მნიშვნელოვნად შეიცვალა. ახლა მთელი ენერგია ბავშვისკენ არის მიმართული და განსაკუთრებული ყურადღებით ვზრუნავთ პატარას გაზრდასა და განვითარებაზე. თემოს გაჩენიდან პირველი კვირების განმავლობაში, გიორგი ღამღამობითაც მეხმარებოდა ბავშვის მოვლაში.
-პატარას დამოუკიდებლად ზრდით თუ ძიძა გეხმარებათ?
-იცით, დამოუკიდებლად, ალბათ, ძალიან გამიჭირდებოდა, ამიტომ ძიძა გვყავს, რომელიც ძალიან მეხმარება.

- თქვენი და ბატონი გიორგის უფროსი შვილები რამდენად არიან ჩართული ამ სასიამოვნო პროცესში?
-გოგონები მოუთმენლად ელოდნენ ბავშვის დაბადებას. ანნა ძალიან ფრთხილად ექცევა პატარა ძმას, ეშინია ჩვილთან თამამი მოპყრობის, მაშო კი შედარებით ყოჩაღად და მოხერხებულად ართმევს თავს და აძინებს კიდეც.

-როგორია პატარა? ჭირვეულია?
-ჩვეულებრივი, ზომიერად ჭირვეული ბავშვია.

-საკმაოდ დიდი პაუზის შემდეგ, მეორედ გახდით დედა. პატარას გაზრდა უზომოდ რთული და მომქანცველი პროცესია. გიჭირთ თუ იოლად უმკლავდებით?
-გეთანხმებით, ძალიან რთულია პატარას მოვლა. როცა მაშო დაიბადა, საკმაოდ ახალგაზრდა ვიყავი და სრულიად მოუმზადებელი აღმოვჩნდი დედობისთვის. მაშინ ბავშვის გაზრდაში დედა ძალიან მეხმარებოდა. თემო კი სრულიად შეგნებულად გავაჩინე და შვილის გაზრდასთან დაკავშირებული პასუხისმგებლობაც თავიდან ბოლომდე მაქვს გაცნობიერებული.

-ადგილი, სადაც პრეზიდენტის ოჯახი ყველაზე კარგად და მყუდროდ გრძნობს თავს...
-ყველაზე კარგად დუშეთში, ჩვენს სახლში ვგრძნობთ თავს, სადაც თემოს ოთახზე მის დაბადებამდე ვიზრუნეთ და წინასწარ მოვუწყვეთ. თუმცა, სამშობიაროდან გამოსვლის შემდეგ, ერთი თვე გიორგის მშობლების სახლში დავყავით და იქაც შესანიშნავად ვგრძნობდით თავს.

წყარრო: okmagazine.ge