დამამცირებელი მდგომარეობა შეღავათების ნაცვლად - სკანდალი ბათუმის დელფინარიუმში

საზოგადოება - 16:47, 09 Jul, 2015

2794

ბათუმის დელფინარიუმთან დაკავშირებით უკვე მეორე დღეა ხმაური არ წყდება. ინტერნეტმომხმარებელთა უმეტესობა დელფინებთან ინტერაქტივის მსურველების კატეგორიებად დაყოფამ და ამ კატეგორიებში შშმ პირების ცალკე მოხსენიებამ და მათთვის დადგენილმა უფრო ძვირმა გადასახადმა აღაშფოთა. ფასების ჩამონათვალის ფოტო სოციალურ ქსელში გავრცელდა
„თავზარი დამცა ამ ფოტოს ნახვამ, რომელიც თათია ბუხრაშვილის მეშვეობით ვნახე - წერს ფოტოგრაფი გოგა ჩანადირი და აქცენტს ბათუმის დელფინარიუმში გადაღებულ ფოტოზე აკეთებს.
გოგა ჩანადირი: „ჩემი ღრმა რწმენით, შეზღუდული შესაძლებლობების მქონე პირები დამამცირებელ მდგომარეობაში არიან ჩაყენებულნი.
იმის ნაცვლად, რომ მათზე შეღავათი დაწესდეს, პირიქით, მომსახურებაზე ფასიც კი გაზარდეს.
ბათუმის დელფინარიუმის წარმომადგენლებს მოგმართავთ, თუ ეს ასეა, თქვენ მხოლოდ შეურაცხყოფას აყენებთ შშმ პირებს. გთხოვთ, გამოასწოროთ.“

გოგა ჩანადირის გარდა ამ ფაქტს უამრავი ადამიანი გამოეხმაურა. „ნიუპოსტი“ ბათუმის დელფინარიუმს დაუკავშირდა, დირექტორთან ნატალია ზოიძესთან გასაუბრება ვერ მოხერხდა, პიარმენეჯერი ბერდია კუტუბიძე მოკლე კომენტარით შემოიფარგლა და დელფინარიუმის ფბ.გვერდზე გადაგვამისამართა.

განცხადება:
სოციალურ ქსელში გავრცელებული გამოხმაურებების საპასუხოდ!
დელფინებთან ინტერაქტივი შეზღუდული შესაძლებლობის მქონე პირთათვის არის სრულიად განსხვავებული, ინდივიდუალური პროგრამა, რომელიც მოიცავს ინდივიდუალურად განსაზღვრულ დროს, ინდივიდუალურ მწვრთნელ-ინსტრუქტორს, რომელიც სამეცნიერო-კვლევითი ცენტრის მიერ სპეციალურად შემუშავებული პროგრამის საფუძველზე მუშაობს თითო შშმ პირთან ინდივიდუალურად. (ჩვეულებისამებრ დელფინებთან ინტერაქტივი არის (4 ადამიანისგან შემდგარი) ჯგუფური მიღება-მომსახურების სერვისი და რადიკალურად განსხვავდება შშმ პირთა ინტერაქტივის პროგრამისგან). ის ასევე მოიცავს ადაპტირებულ საშხაპეებს, სხეულის სტერილიზაციას, სპეციალურ ჰიდროკოსტიუმს (მოთხოვნის შესაბამისად).
აქვე ერთი განმარტება: ინტერაქტივი არის სრულიად სხვა პროგრამა და დელფინთერაპია (რომელიც ბათუმის დელფინარიუმი არ ტარდება), სულ სხვა. ამასთან შშმ პირთათვის დელფინარიუმში დელფინებთან ინტერაქტივის მომსახურების ღირებულება მოქმედებს სერვისის ამოქმედების დღიდან (უკვე 5 წელია) და ეს ტარიფი არასოდეს შეცვლილა. ეტლით მოსარგებლეთათვის შშმ პირთათვის დელფინარიუმის შოუზე დასწება (დღიდან მისი დაარსებისა) უფასოა.
ინფრასტრუქტურაში შედის შეზღუდული შესაძლებლობის მქონე პირთა მომსახურება პანდუსითა და ლიფტებით. დელფინარიუმი და ”6 მაისის პარკი” მუდამ მზად არის ემსახუროს შშმ პირებს. ის ერთ-ერთი ინიციატორია რეგიონში, რომელმაც ხელი შეუწყო და ყოველთვის შეუწყობს შშმ პირთა ადაპტაციას, დასაქმებას და სოციალიზაციას. კონკრეტული მაგალითების დასახელებისგან თავს შეგნებულად ვიკავებთ, ვინაიდან სწორედაც, ამ ფაქტით სპეკულირება იქნება მათი დისკრიმინაცია.