"ელიმინაციის პროგრამაში ჩართული 32 პაციენტიდან, 23 პაციენტს C ჰეპატიტის ვირუსი აღარ აღენიშნება"

საზოგადოება - 13:59, 07 Jul, 2015

1169

ჯანდაცვის მინისტრის მოადგილის ვალერი კვარაცხელიას თქმით, C ჰეპატიტის ელიმინაციის პროგრამაში ჩართული 32 პაციენტიდან, ერთი თვის მკურნალობის შემდეგ 23 პაციენტს C ჰეპატიტის ვირუსი სისხლში აღარ აღენიშნება. მისი ინფორმაციით, C ჰეპატიტის ელიმინაციის პროგრამის ფარგლებში მკურნალობას გადის 1700 პაციენტი.

"მკურნალობის დაწყებიდან 1 თვის შემდეგ, ბენეფიციარების კვლევის შედეგები შემდეგნაერია:
პირველი 32 პაციენტიდან, რომლებმაც C ჰეპატიტის სამკურნალო მედიკამენტი 14 მაისს მიიღეს, მათგან 23-ს სისხლში ჰეპატიტის ვირუსი აღარ უფიქსირდება. რაც შეეხება დანარჩენ 9 პაციენტს, მკურნალობის დაწყებამდე, რაოდენობრივი კვლევის შედეგად ვირუსის რაოდენობა სისხლში შედაგენდა 15 000 000-ს და მეტს. დღეის მდგომარეობით, ამ 9 პაციენტის რაოდენობრივი კვლევის შედეგები არ აღემატება 30 ერთეულს.
რაც შეეხება დანარჩენ პაციენტებს მკურნალობა გეგმის მიხედვით მიდის და ჰეპატოლოგების პროგნოზი დამაიმედებელია.
C ჰეპატიტის ელიმინაციის პროგრამის ფარგლებში მკურნალობას გადის 1700 პაციენტი. რეგისტრაცია გავლილი აქვს 7000-მდე ბენეფიციარს, რომლებიც ეტაპობრივად ჩაერთვებიან პროგრამაში.
ელიმინაციის პროგრამაში შემდეგი კვირიდან ზუგდიდიც ჩაერთვება. ეტაპობრივად მოხდება პროგრამაში დანარჩენი რეგიონების დამატებაც", - განაცხადა კვარაცხელიამ.
შეგახსენებთ, რომ პირველ ეტაპზე მკურნალობაში ერთვება 5000 პაციენტი, რომელთაც ღვიძლის მე-3 და მე-4 ხარისხის დაზიანებები აქვთ. რაც შეეხება ელიმინაციის პროგრამის მე-2 ეტაპს, ნოემბრიდან საქართველოში C ჰეპატიტის სამკურნალო უახლესი მედიკამენტი „ჰარვონი“ შემოვა. სწორედ ამ მედიკამეტით იმკურნალებენ C ჰეპატიტით დაავადებული პაციენტები, რომლებსაც ღვიძლის პირველი და მე-2 ხარისხის დაზიანებები აქვთ.