ჯარიმებიდან სისხლის სამართლის საქმემდე - სუპერთასის მატჩთან დაკავშირებით მკაცრი შეზღუდვები დაწესდა

საზოგადოება - 11:17, 07 Jul, 2015

2267

UEFA-ს სუპერთასის მატჩთან დაკავშირებით საქპატენტი შეზღუდვებს აწესებს. საუბარია UEFA-ს ინტელექტუალური საკუთრების დაცვაზე. ინიციატივა უზრუნველყოფს, რომ არ მოხდეს ლოგოს უნებართვოდ გამოყენება, ბილეთებით უკანონო ვაჭრობა და სხვადასხვა ტელევიზიებით მატჩის უკანონოდ ჩვენება.

იმ შემთხვევაში, თუ მოხდება UEFA-ს ლოგოს ან სხვა ნიშნის უკანონოდ გამოყენება დაწესებული იქნება ჯარიმა 5 000 ლარამდე ოდენობით. ასევე "დინამო-არენას" ტერიტორიაზე აიკრძალება ყველა ტიპის გარევაჭრობა. ბილეთების გადაყიდვისთვის გათვალისწინებულია ჯარიმა, შესაძლოა აღიძრას სისხლის სამართლის საქმეც.

„საქპატენტის“ თავმჯდომარემ ნიკოლოზ გოგილიძემ ჟურნალისტებთან საუბრისას განმარტა, რომ "დინამო არენას" ტერიტორიაზე და აგრეთვე იმ ქუჩებზე, სადაც გულშემატკივართა შეკრების ადგილებია, UEFA-ს ოფიციალური სპონსორების გარდა, ყველა სხვა კომპანიის ნებისმიერი სარეკლამო აქტივობა, ნებისმიერი ტიპის გარევაჭრობა და მაღაზიებისა და კაფე-ბარების მიერ UEFA-ს მატჩის სარეკლამო მიზნით გამოყენება კანონით იქნება აკრძალული.

პრესკონფერენციაზე ნიკოლოზ გოგილიძემ სოციალური ვიდეორგოლი წარადგინა, რომელიც სპეციალურად სუპერთასის მატჩისთვის დამზადდა. მან ასევე წარადგინა ის ჯგუფი, რომელიც საინფორმაციო ფლაერებს დაურიგებს და განუმარტავს განსაზღვრულ პერიმეტრზე მოქმედ მაღაზიებისა და კაფე-ბარების თანამშრომლებს, რა ქმედებები იკრძალება კანონით.

UEFA-ს სუპერთასის მატჩი „დინამო არენაზე“ 11 აგვისტოს გაიმართება. ერთმანეთს „სევილია“ და „ბარსელონა“ დაუპირისპირდებიან.