სათანადოდ ვერ შევაფასე ის ბიუროკრატიული მანქანა, რომელიც უკრაინაში იყო

სათანადოდ ვერ შევაფასე ის ბიუროკრატიული მანქანა, რომელიც უკრაინაში იყო - კვიტაშვილი

საზოგადოება - 18:35, 06 Jul, 2015

1874

უკრაინის ჯანდაცვის ყოფილმა მინისტრმა, ალექსანდრე კვიტაშვილმა „მე-5 არხს“ ვრცელი ინტერვიუ მისცა.

მისი თქმით, უკრაინის რეფორმირების მთავარ პრობლემას, გადაწყვეტილების მიღების ეტაპზე, საკანონმდებლო შტოს მიერ ხელისუფლების აღმასრულებელი ვერტიკალის ძლიერი რეგულირება და მინისტრთა კაბინეტის სუსტი ავტონომია წარმოადგენს.

კვიტაშვილის თქმით, მის გადაყენებასთან დაკავშირებით "პეტრო პოროშენკოს ბლოკის" ინიციატივის შესახებ მედიიდან შეიტყო.

"ჩემთვის ამის შესახებ ფრაქციის წარმომადგენლებს არაფერი უთქვამთ, არც სხვას არავის მოუწოდებია მსგავსი ინფორმაცია" - განაცხადა კვიტაშვილმა.

მისივე თქმით, მოულოდნელი არამხოლოდ მისი გადადგომის შესახებ ინიციატივა, არამედ ამ საკითხზე გადაწყვეტილების ასე სწრაფად მიღებაც იყო.

„ეს დიდი ხნის განმავლობაში მზადდებოდა, მაგრამ ჩემთვის მაინც მოულოდნელი იყო ამ თემის დღეების განმავლობაში ესკალაცია“ - აღნიშნა ექს მინისტრმა.
კვიტაშვილის თქმით, მან შეძლო არა მხოლოდ სახელმწიფო შესყიდვების სისტემების, არამედ მთავრობის პროგრამების შეცვლაც.

უკრაინის ჯანდაცვის ყოფილმა მინისტრმა აღნიშნა, რომ მან და მისმა გუნდმა მოახერხა და განაახლა თანამშრომლობა იმ საერთაშორისო ორგანიზაციებთან, რომელთან კომუნიკაციის პრობლემის გამო ამის სურვილი აღარ ჰქონდათ.

ალექსანდრე კვიტაშვილმა სამინისტროში მუშაობისას მის ყველაზე დიდ შეცდომად, უკრაინული ბიუროკრატიის სათანადოდ შეუფასებლობა დაასახელა.

„მე სათანადოდ ვერ შევაფასე ის ბიუროკრატიული მანქანა, რომელიც აქ იყო“- აღნიშნა კვიტაშვილმა.

შეგახსენებთ, ალექსანდრე კვიტაშვილი უკრაინის ჯანდაცვის მინისტრის პოსტზე გასული წლის ბოლოს დაინიშნა. გასულ კვირას კი მან გადადგომის შესახებ განცხადება მას შემდეგ დაწერა, რაც საპარლამენტო ფრაქცია "პეტრო პოროშენკოს ბლოკი" მისი გათავისუფლების ინიციატივით გამოვიდა. ,,პრეტრო პოროშენკოს ბოლკის“ ლიდერმა იური ლიცენკომ პარლამენტში განაცხადა, რომ მის პოლიტიკურ ძალას ბევრი კითხვა აქვს ჯანდაცვის სამინიტროში არსებულ კატასტროფულ სიტუაციასთან დაკავშირებით და პეტრო პოროშენკოს ბლოკი ვერ მოითმენს იმ უმოქმედობას, რომელიც უკრაინელებისთვის ამ მნიშვნელოვან უწყებაში ხდება.

ხატია ლაღიძე