თბილისის მერმა ახალი ზოოპარკის ტერიტორია დაათვალიერა

საზოგადოება - 17:08, 04 Jul, 2015

1748

თბილისის მერმა დავით ნარმანიამ მერიის ეკოლოგიისა და გამწვანების საქალაქო სამსახურის უფროსთან, ბიძინა გიორგობიანთან ერთად, თბილისის ზღვის ტერიტორიაზე ახალი ზოოპარკის ტერიტორია დაათვალიერა. ტერიტორიაზე უკვე დაწყებულია გამწვანების სამუშაოები და აქ რამდენიმე ათეული ათასი ძირი ნერგია დარგული.

როგორც დავით ნარმანიამ განაცხადა, ზოოპარკის პროექტი მზად არის და მოსამზადებელი სამუშაოები ტერიტორიაზე შემოდგომაზე, სამშენებლო პროცესი კი მომავალი წლის გაზაფხულზე დაიწყება.

"ტერიტორია, სადაც ვიმყოფებით, განკუთვნილია თბილისის ახალი ზოოპარკისთვის. აქ გასული წლის შემოდგომაზე ჩვენ 38 000 ხე დავრგეთ და დღეს მოვედით, რათა ვნახოთ მათი მდგომარეობა. აქ ნარგავების ყოველდღიური მოვლა-პატრონობა ხდება. ტერიტორია არის დროებით შემოღობილი. მომავალი ზოოპარკის ტერიტორიაზე გავაკეთეთ ძაღლსაშენი, აქვე არის ცხენების თავლა. ეს ტერიტორია იქნება ძალიან ლამაზად გამწვანებული და ზოოპარკი გაცილებით დიდი ტერიტორიაზე მოეწყობა. პროექტი, რომლის კონცეფციაც მზად არის, კონკრეტული მუშა ნახაზების მომზადებას საჭიროებს. ჩვენი ამოცანაა, ცხოველები რაც გადარჩა, გვყავდეს უსაფრთხოდ. მოსამზადებელი სამუშაოები მიმდინარე წლის შემოდგომაზე, სამშენებლო პროცესი კი მომავალი წლის გაზაფხულზე დაიწყება", - განაცხადა დავით ნარმანიამ.

დღესვე თბილისის მერმა დენდროლოგიური პარკიც მოინახულა, სადაც გასული წლის შემოდგომაზე და მიმდინარე წლის გაზაფხულზე 44 000 ხე დაირგო.