„ვედომოსტის“ ინფორმაციით, რუსული ფინანსურ–სამრეწველო ჯგუფის „სისტემას“ მმართველობის საბჭოს ბიზნესმენი ლევან ვასაძე დაუბრუნდა. ვასაძე , რომელიც წარსულში კორპორაციის ერთერთი საკვანძო ტოპმენეჯერი იყო, კვლავ კორპორაციის ვიცე––პრეზიდენტი გახდა და ერთ-ერთი საინვესტიციო პორტფელი ჩაიბარა.

ამასთანავე „ვედომოსტის“ ინფორმაციით „სისტემას“ მმართველობა დატოვეს პირველმა ვიცე–პრეზიდენტმა ანტონ აბუგოვმა და კრისტოფერ ბაქსტერმა.

ვასაძე „სისტემაში“ 1998 წლიდან 2006 წლამდე მუშაობდა და პირველი ვიცე–პრეზიდენტის პოსტს იკავებდა, იმ პერიოდში ის სტრატეგიული განვითარების საკითხებს კურირებდა და ხელმძღვანელობდა „ემ ტე ეს“–ის IPO–სთვის მომზადებას, ასევე თავად კორპორაციას, „კომსტარასა“ და „სისტემა გალსს.“

2006 წელს ის სათავეში ჩაუდგა სადაზღვევო კომპანია „როსნოს,“ რომლის თანამფლობელიც „სისტემა“ იყო.

რამდენიმე თვეში გერმანულმა კომპანია Allianz–მა „როსნო“–ში „სისტემას“ წილი გამოისყიდა და ვასაძემ კომპანია დატოვა. მომდევნო წლებში მან პარტნიორებთან ერთად დააარსა საინვესტიციო ფონდები Prometheus Capital Partners და CIS Acquisition. ეს უკანასკნელი გასული წლის სექტემბრიდან ერთიანდებოდა ჩინურ ქიმიურ კომპანია Delta Technology Holdings Ltd–სთან. Prometheus–მა 2010 წელს ზოომაღაზიების ქსელი „ბეთჰოვენი“ და „ზოობუმი“ შეიძინა. „ვედომოსტი“ წერს, რომ ლევან ვასაძემ ასევე დააარსა იაკობ გოგებაშვილის სახელობის მართლმადიდებლური სასწავლებელი საქართველოში.

რუსული საფინანსო–სამრეწველო ჯგუფ „სისტემას“ შტაბბინა მოსკოვში მდებარეობს. კომპანია Fortune Global 500-ის 2013 წლის სიაში 308–ე ადგილს იკავებს.