რუსეთიდან შემოტანილი ფქვილი ადგილობრივ წისქვილ-კომბინატებს პრობლემებს უქმნის

საზოგადოება - 19:09, 30 Jun, 2015

4762

მეხორბლეების ასოციაციაში დღეს გამართულ შეხვედრაზე არასამართლიან ფასებსა და რუსეთიდან იმპორტირებული ფქვილის და ხორბალის გამო შექმნილ პრობლემებზე ისაუბრეს. მათი თქმით რუსეთიდან შემოტანილი პროდუქცია ადგილობრივ წისქვილ-კომბინატებს პრობლემებს უქმნის, რის გამოც შესაძლებელია, წელს ფერმერებისგან მოსავლის სრულად ჩაბარება ვერ მოხერხდეს. ასოციაციის წარმომადგენლები წისქვილ-კომბინატების ნაწილის დროებით გაჩერებას არ გამორიცხავენ.

საქართველოს წისქვილკომბინატთა ასოციაციის აღმასრულებელი დირექტორის ლევან სილაგავას განცხადებით, თუ წისქვილ-კომბინატები ქართულ ხორბალს შესაბამისი რაოდენობით ვერ მიიღებენ მათ გაჩერება, ან ნახევარი სიმძლავრით მუშაობა მოუწევთ.

„არასამართლიანი ფასის ცნება და თემა ეს არის რუსეთიდან იმპორტირებული ფქვილი, წისქვილკომბინატები შეიძლება პრობლემის წინაშე დადგნენ და ან გაჩერდნენ, ან ნახევარი სიმძლავრით იმუშაონ, რადგან ისინი ქართულ ხორბალს შესაბამისი რაოდენობით ვერ მიიღებენ“- განაცხადა სილაგავამ.

საქართველოს მეხორბლეთა ასოციაციის ხელმძღვანელის გოდერძი ჩანქსელიანის თქმით ფქვილის შემოტანა არაკანონიერი გზით, დაბალ ფასებში ხდება , ამის გამო კი ადგილობრივი წარმოება გაჩერების ზღვარზეა :

„მოვითხოვთ, რომ უფრო გაკონტროლდეს შემოტანილი ფქვილის რაოდენობა და ხარისხი და გაკომტროლდეს მისი შემოტანის გზები“- განაცხადა გოდერძი ჩანქსელიანმა.