საქართველოს ფეხბურთის ფედერაცია გაფრთხილებთ, რომ არ შეიძინოთ არც ერთ სხვა საიტზე ბილეთები გარდა საიტისა www.biletebi.ge.

ამის შესახებ ფედერაციის პრესსამსახურის მიერ გავრცელებულ განცხადებაშია ნათქვამი.

„მიუხედავად იმისა, რომ მომხმარებელთა სიმრავლის გამო აღნიშნული საიტი დროებით დაბლოკილია, გთხოვთ, ნუ გახდებით გადამყიდველთა და ცრუ საიტების მსხვერპლი და ნუ შეიძენთ არარსებულ ბილეთებს გაასმაგებულ ფასად.

www.biletebi.ge - ს ინფორმაციით საიტის ადმინისტრაცია ამ დროისათვის მუშაობს არსებული ხარვეზის გამოსასწორებლად და ბილეთების შეძენა უახლოეს საათებში შესაძლებელი გახდება“, - ნათქვამია განცხადებაში.

უეფა-ს სუპერთასის ფინალზე დასასწრები ბილეთების გაყიდვა დღეს დილის 09:00 საათიდან შეჩერებულია. biletebi.ge-ს ადმინისტრაციის ინფორმაციით, საიტზე მოხდა კიბერშეტევა. ადმინისტრაციის განცხადებით, პრობლემების აღმოფხვრაზე მუშაობენ და ეცდებიან საიტი მალე ჩაირთოს.