UEFA-ს მატჩის ბილეთების გაყიდვა შესაძლოა ხვალისთვის გადაიდოს. აღნიშნულთან დაკავშირებით საგანგებო განცხადება გააკეთა ფეხბურთის ფედერაციის პრეზიდენტმა ზვიად სიჭინავამ.

მისი თქმით, საიტზე წუთში 10 ათასი კაცი შევიდა, რამაც მისი გათიშვა გამოიწვია. როგორც სიჭინავა ამბობს, ხარვეზის აღმოფხვრა უეფასაც კი გაუჭირა.

"ტესტი გათვლილი იყო 2500 მყიდველზე წუთში. სამწუხაროდ, დღეს მოგვაწოდეს ინფორმაცია, რომ საიტზე შევიდა 10 ათასი კაცი წუთში. ხაზზე გვყავს ეს კომპანია და ყველაფერს აკეთებენ იმისთვის, რომ ეს ხარვეზები გაასწორონ და ნორმალური გაყიდვები დაიწყონ", - განაცხადა დღევანდელ საგანგებო ბრიფინგზე ზვიად სიჭინავამ.

უეფა-ს სუპერთასის ფინალზე დასასწრები ბილეთების გაყიდვა დღეს დილის 09:00 საათიდან შეჩერებულია.

შეგახსენებთ, 11 აგვისტოს, "დინამო არენაზე" "ბარსელონა" "სევილიას" დაუპირისპირდება.