ილია მეორე ყოველთა ქართველთა კონგრესის ჩატარების ინიციატივით გამოდის

საზოგადოება - 14:32, 21 Jun, 2015

1894

სრულიად საქართველოს კათოლიკოს- პატრიარქი სვეტიცხოვლობას ყოველთა ქართველთა კონგრესის ჩატარების ინიციატივით გამოდის. ამის შესახებ ილია მეორემ საკვირაო ქადაგებაზე ბრძანა. უწმინდესის თქმით, მეტი უნდა ვიფიქროთ იმაზე, რომ უცხოეთში მცხოვრებმა თანამემამულეებმა არ დაკარგონ თავისი ენა, სარწმუნოება და სამშობლოს სიყვარული. პატრიარქის თქმით, ყოველთა ქართველთა კონგრესით, კიდევ ერთხელ უნდა შევახსენოთ უცხოეთში მცხოვრებ ქართელებს, რომ მათ არ დაკარგონ კავშირი სამშობლოსთან.

,,თუ ქართული სული დაიკარგა იმათში, ეს ადამიანები დაკარგულია. რა უნდა გავაკეთოთ ჩვენ იმისთვის, რომ უცხოეთში მცხოვრები ქართველები დავუკავშიროთ სამშობლოს? ჩვენ გვაქვს სურვილი, რომ სვეტიცხოვლობას, 14 ოქტომბერს, მოვიწვიოთ ყოველთა ქართველთა კონგრესი საქართველოში და კიდევ ერთხელ გავახსენოთ ჩვენს სისხლსა და ხორცს, რომ მათი წინაპრები აქ არიან და არ უნდა დაკარგონ კავშირი სამშობლოსთან. რა უნდა გავაკეთოთ იმისთვის, რომ მათ არ დაივიწყონ ქართული ენა? ქართველი ადამიანი გვგონია ისეთი ძლიერი გენისა, რომ ის არ დაიკარგება, მაგრამ სჭირდება სამშობლოს დახმარება, ჩვენი შეხსენება. ამიტომ მოგმართავთ თქვენ, უპირველეს ყოვლისა, ჩვენ შევადგინოთ სია თქვენი ნათესავების, რომლებიც უცხოეთში არიან და ყველაფერი უნდა გავაკეთოთ იმისათვის, რომ დავაკავშიროთ ისინი სამშობლოსთან. ძალიან ბევრია წასული უცხოეთში, მარტო რუსეთში, ალბათ, მილიონზე მეტი. ჩვენ ასევე დიდი ყურადღება უნდა მივაქციოთ ფერეიდნელ ქართველებს, რომლებიც შაჰ-აბასის დროს წაიყვანეს აქედან. ისინი ელოდებიან ჩვენს დახმარებას. ის ჩვენი სისხლი და ხორცია. ჩვენ ყურადღება უნდა მივაქციოთ თურქეთში, ევროპაში, ამერიკაში და მთელ მსოფლიოში მცხოვრებ ქართველებს. საქართველო ელოდება თქვენს ჩამოსვლას. როგორც მშობელი დედა, ისე მიგიღებთ თქვენ სამშობლოში. იმედი მაქვს, რომ ჩვენ შევძლებთ ჩვენი ერის გაერთიანებას", - განაცხადა სრულიად საქართველოს კათოლიკოს-პატრიარქმა.