ცხოველის ნაკვალევის წარმომავლობის დადგენას სპეციალისტები ცდილობენ- ღიბრაძე

საზოგადოება - 13:39, 20 Jun, 2015

1843

სახელმწიფო უსაფრთხოებისა და კრიზისების მართვის საბჭოს მდივნის მოადგილე გიორგი ღიბრაძემ საგანგებო ბრიფინგი გამართა და სტიქიის შედეგები შეაჯამა. ღიბრაძის მიერ გავრცელებული ინფორმაციის მიხედვით, ამ წუთებში გორის რაიონის სოფელ რეხში, ცხოველის ნაკვალევის შესწავლის მიზნით შესაბამისი სამსახურების წარმომადგენლები იმყოფებიან და ტარდება საჭირო ღონისძიებები.

"19 ივნისის საღამოს 20:00 საათიდან ამ დრომდე 112-ში შევიდა 40-ზე მეტი შეტყობინება სხვადასხვა ადგილზე ცხოველთა დაფიქსირების შესახებ. ყველა მათგანზე მოხდა სათანადო რეაგირება. არცერთი მათგანი არ დადასტურდა.

გორის რაიონის სოფელ რეხში დაფიქსირებული ნაკვალევის წარმომავლობის დადგენის მიზნით ადგილზე გასული არიან სპეციალისტები და შესაბამისი სამსახურების წარმომადგენლები. მიმდინარეობს ვითარების შესწავლა და ტარდება სათანადო ღონისძიებები.

სტიქიით დაზარალებულ ყველა ლოკაციაზე აქტიურად გრძელდება გაწმენდითი სამუშაოები.

მზიურის ტერიტორიაზე სპეციალური განათების სისტემების გამოყენებით გაწმენდითი სამუშაოები კვლავ მთელი ღამის განმავლობაში მიმდინარეობდა. დილის 7:00 სთ-დან სამუშაოები სრული მასაშტაბით გაგრძელდა. მაშველები და მოხალისეები უზრუნველყოფილი არიან საკვებით, სასმელი წყლით და შესაბამისი აღჭურვილობით. კედევ ერთხელ მოვუწოდებთ მოხალისეებს დაიცვან უსაფთხოების დადგენილი ზომები, ჰიგიენის წესები და ჯანდაცვის სამინისტროს რეკომენდაციები.

ზოოპარკის ტერიტორიაზე გაწმენდითი სამუშაოები ასევე მთელი ღამის განმავლობაში მიმდინარეობდა. ხორციედება წყლის ამოტუმბვა და ვოლიერების გაწმენდა.

სვანაძის ქუჩაზე აგრეთვე გრძელდება შესაბამისი სამუშაოები.

ვაკის სასაფლაოს ტერიტორიაზე მიმდინარეობს მოწყობა-აღდგენითი სამუშაოები.

ბაგებში მიმდინარეობს კოლექტორის აღდგენითი სამუშაოები.

წყლის ამოტუმბვის დასრულებისთანავე დაიწყება ყოფილი აბრეშუმის ფაბრიკასთან მისასვლელი გზების გაწმენდითი სამუშაოები.

საპროექტო სამსახურის მიერ მომზადებული ბეტონის დამცავი კედლის პროექტის მიხედვით, წყნეთის ქუჩაზე, დღეს იგეგმება 10-მდე ხიმინჯის აღმართვა მდ.ვერეს კალაპოტში მოწყობილ სპეციალურ დამბაზე",-განაცხადა სახელმწიფო უსაფრთხოებისა და კრიზისების მართვის საბჭოს მდივნის მოადგილე გიორგი ღიბრაძემ.

ფოტო არ ასახავს ტექსტში მოყვანილ ფაქტს