”არანაირი შემოთავაზება არ ყოფილა, არ გამაგიჟოთ, რას მეუბნებით?”- თამაზ ელიზბარაშვილი

საზოგადოება - 00:12, 20 Jun, 2015

5615

ბიზნესმენი თამაზ ელიზბარაშვილი, რომლის ძაღლების თავშესაფარიც 13 ივნისის სტიქიამ გაანადგურა, უარყოფს იმ ფაქტს, რომ 4 ივნისს მისი თავშესაფრის დატბორვის შემდეგ მერიამ მას ახალი ტერიტორია შესთავაზა, მან კი უარი განაცხადა.

”ქალაქის მერმა თუ ჩემთან ვინმე გამოაგზავნა, ჩემამდე არ მოსულა, არ შემოუთავაზებიათ, თქვენ როგორ ფიქრობთ, რომ შემოეთავაზებინა ვინმეს მე ასეთი რისკის ქვეშ დავაყენებდი ჩემს შვილებს და მშობლებს, განადგურებულია ჩემი სახლიც და ოფისიც. შემოთავაზება იყო 14 ივნისს ეკონომიკის სამინისტროდან და არა მერიიდან. მანამდე არანაირი შემოთავაზება არ ყოფილა, არ გამაგიჟოთ, რას მეუბნებით.” - განაცხადა ელიზბარაშვილმა, მისი თქმით დედაქალაქში 24 საათიანი მუშაობა უნდა მიმდინარეობდეს სვანიძის ქუჩაზე კი სამუშაოები 9 საათზე წყდება- ”რაღა პიკი საათის დროს უნდა მუშაობდნენ, როდესაც გადატვირთულია ქალაქი, ახლა უნდა მუშაობდნენ და გაიტანონ ნაგავი”

ელიზბარაშვილის თქმით სვანიძის ქუჩისთვის სათანადო ყურადღება 4 ივნისის წყალდიდობის დროს რომ მიექციათ, 13 ივნისის სტიქიის მასშტაბები ასეთი დიდი არ იქნებოდა.

”4 ივნისის წყალდიდობის შემდეგ ჩამოტანილი მდინარე ვერე ჩამოტანილი შლამისა და ნაგავისგან, რომ გათავისუფლებულიყო 13 ივნისს ასეთი უბედურება არ მოხდებოდა”- აღნიშნა ელიზბარაშვილმა.