ბაგების და კუს ტბის ტერიტორიაზე მონადირეებმა მტაცებელი ვერ აღმოაჩინეს- ღიბრაძე

საზოგადოება - 20:28, 19 Jun, 2015

1740

სახელმწიფო უსაფრთხოებისა და კრიზისების მართვის საბჭოს მდივნის მოადგილე გიორგი ღიბრაძემ საგანგებო ბრიფინგი გამართა და სტიქიის შედეგები შეაჯამა. ღიბრაძის მიერ გავრცელებული ინფორმაციის მიხედვით, მონადირეებმა, რომლებიც ზოოპარკიდან გაქცეულ ცხოველებს ეძებენ, კუს-ტბის და ბაგების ტერიტორიაზე ვეფხვი ვერ აღმოაჩინეს.

"დღეს გავრცელდა ინფორმაცია ეთნოგრაფიული მუზეუმის მიმდებარე ტერიტორიაზე ზოოპარკიდან გაქცეული ვეფხვის დაფიქსირების შესახებ. შინაგან საქმეთა სამინისტრომ და მერიის შესაბამისმა სამსახურმა მოხალისე მონადირეთა ჯგუფებთან ერთად შემოწმეს კუს ტბის, ეთნოგრაფიული მუზეუმის და სვანიძის ქუჩის მიმდებარე ტერიტორიები, მტაცებელი არსად დაფიქსირდა. შესაბამისი სამსახურები მონადირეთა ჯგუფებთან ერთად კვლავ აგრძელებენ ცხოველთა ძებნას. მოსახლეობას კიდევ ერთხელ მოვუწოდებთ სიფრთხილისკენ.

მარნეულის მუნიციპალიტეტის სოფელ ამბაროვკაში მტკვრის მიერ ზოლებიანი აფთრის გამორიყვის თაობაზე გავრცელებულ ინფორმაციას, ამ მომენტში ამ ადგილისკენ მიემართებიან ზოოპარკის და შესაბამისი სამსახურების წარმომადგენლები, რათა მოხდეს ცხოველის იდენტიფიცირება.

სულ 112-ში გარეულ ცხოველთა ამა თუ იმ ადგილზე დაფიქსირების თაობაზე ამ დროისთვის 72 ზარი შევიდა. ყველა მათგანზე მოხდა რეაგირება, თუმცა არცერთი არ დადასტურდა.

საქართველოს შრომის, ჯანმრთელობისა და სოციალური დაცვის სამინისტროს მონაცემებით დღეის მდგომარეობით (19ივნისის 14:30 საათის მონაცემებით) ტეტანუსის საწინააღმდეგო ვაქცინაცია ჩაუტარდა 948 ბენეფიციარს. შპს მ. იაშვილისსახელობის ბავშვთა ცენტრალური საავადმყოფოში მზიურის ტერიტორიიდან შეყვანილია ერთი მოხალისე, თავისზედაპირული ტრავმის დიაგნოზით, ამ ეტაპზე ზუსტდება დიაგნოზი უტარდება კვლევები.

სოფლის მეურნეობის სამინისტროს სსიპ სურსათის ეროვნული სააგენტოს ვეტერინარებმა ბიოსაფრთხის რისკის შემცირებისმიზნით ზოოპარკის შესასვლელთან სადეზინფექციო ბარიერი მოაწყვეს. ღონისძიება პრევენციულ ხასიათს ატარებს.ზოოპარკის ტერიტორიიდან გამომავალი ავტომობილების საბურავები სპეციალური ხსნარით მუშავდება.

საქართველოს შინაგან საქმეთა სამინისტროს მონაცემებით, სტიქიის შედეგად დაღუპულთა და უგზო-უკვლოთ დაკარგულთა რაოდენობა ამ დროისთვის უცვლელია (დაღუპულია 19, ხოლო უგზო-უკვლოდ დაკარგულად ითვლება 3 ადამიანი),"-განაცხადა სახელმწიფო უსაფრთხოებისა და კრიზისების მართვის საბჭოს მდივნის მოადგილემ გიორგი ღიბრაძემ.