სტიქიას "თბილისი 2015" - სთვის აშენებული ობიეტები არ დაუზიანებია- ოლიმპიური კომიტეტი

საზოგადოება - 17:18, 19 Jun, 2015

1377

ოლიმპიური კომიტეტის ხელმძღვანელმა ალექსი ახვლედიანმა კომიტეტის სხვა წევრებთან ერთად პრეს-კონფერენცია გამართა, მთავარი თემა 13 ივნისს მომხდარი სტიქიის შედეგები იყო.

ევროპის ახალგაზრდული ოლიმპიური ფესტივალის, “თბილისი 2015”-ის საორგანიზაციო ჯგუფის განცხადებით, ფესტივალის სამზადისი შეფერხების გარეშე მიმდინარეობს; სტიქიის შედეგად არც ერთი სპორტული ობიექტი და ოლიმპიური სოფლის ტერიტორია არ დაზიანებულა.

ევროპის ოლიმპიური კომიტეტის პრეზიდენტის პატრიკ ჰიკის დავალებით, თბილისში 13 ივნისის სტიქიის შედეგების გასაცნობად და ოლიმპიური ფესტივალის ტერიტორიაზე მონიტორინგის ჩასატარებლად არაგეგმიური ვიზიტით კომიტეტის საკოორდინაციო კომისიის თავმჯდომარე ჯოზეფ ლიბა და კომისიის მენეჯერი კატერინა ნიცოვა იმყოფებიან. მათ მოინახულეს ობიექტები და შეხვდნენ პრემიერ მინისტრ ირაკლი ღარიბაშვილს.

”ჩვენს ახლაშენებულ ნაგებობებს სტიქიის დროს პრობლემა არ შექმნიათ. ჩვენმა სტუმრებმა მოინახულეს ყველა ობიექტი და შეხვდნენ პრემიერს, რომელმაც სრულ მზადყოფნა გამოთქვა ჩვენს დასახმარებლად,” - განაცხადა ალექსი ახვლედიანმა

ევროპის ოლიმპიური კომიტეტის წევრები ბაქოში პირველ ევროპურ თამაშებს ესწრებიან და თბილისში გუშინ, საგანგებოდ ბაქოდან ჩამოფრინდნენ.

”ბაქოში ბევრი ცრუ ინფორმაცია გავრცელდა. ვიცოდით, რომ თბილისი სრულად წყლის ქვეშ იყო, ამიტომ გადავწყვიტეთ ქალაქში ჩამოვსულიყავით და ყველაფერი ადგილზე დაგვეთვალიერებინა. მოხარული ვართ, რომ ყველაფერი გეგმის მიხედვით მიმდინარეობს და დღეს, როგორც ოლიმპიადის ჩატარებას, ისე ქალაქს საფრთხე აღარ ემუქრება,”- განაცხადა ჯოზეფ ლიბამ.

როგორც ლექსი ახვლედიანმა განაცხადა, მედიის წარმომადგენლებს საშუალება მიეცემათ სამშენებლო სამუშაოების დასრულების შემდეგ მოინახულონ ოლიმპიადის გასამართად შერჩეული ტერიტორიები და ახლად აშენეული ობიექტები.

საქართველოში ოლიმპიური ცეცხლი 26 მაისს ჩამოვიდა. 14 ივლისს მას უკვე თბილისში შემოიტანენ. ცეცხლი სხვადასხვა რაიონის მოვლის შემდეგ კუს ტბის ტერიტორიაზე აინთება.