საპარტნიორო ფონდმა და „ვანრიკ აგრომ“ ლურჯი მოცვის ევროპულ ბაზარზე გატანა დაიწყეს

ბიზნესი & ეკონომიკა - 12:08, 19 Jun, 2015

1766

ოზურგეთის რაიონის დაბა ლაითურში „ვანრიკ აგრომ“ ლურჯი მოცვის კრეფა და ევროპაში სარეალიზაციოდ შეფუთვა დაიწყო. ლურჯ მოცვს ბრიტანეთში არსებული სუპერმარკეტების ქსელი „ვოლმარტი“ შეისყიდის.

დიდი ბრიტანეთის გარდა, პროდუქცია მიმდინარე წელს ჰოლანდიის, რუსეთის, სომხეთის და ბალკანეთის ქვეყნების ბაზრებზე გაიყიდება. კომპანია წარმოებული პროდუქციის 90%-ს საექსპორტოდ ამზადებს.

სოფლის მეურნეობის სექტორში სს „საპარტნიორო ფონდის“ პროექტმა „ვანრიკ აგრომ“ „გლობალგეპის“ (Global GAP) სერტიფიკატი მიიღო, რაც მის მიერ წარმოებული პროდუქციის ხარისხისა და ტექნოლოგიების ევროსტანდარტებთან შესაბამისობას ადასტურებს.

პროექტში ამჟამად 150-ზე მეტი ადგილობრივია დასაქმებული, რომლებიც სეზონურად იმუშავებენ. „ვანრიკ აგროს“ მუდმივად 100 სრულ განაკვეთზე მომუშავე თანამშრომელი ჰყავს. პროექტის განვითარების შემდეგ კომპანიას სეზონურად 1000-მდე მუშახელი დასჭირდება. ლურჯი მოცვის პლანტაციის განაშენიანება დამატებით 70 ჰექტარ ტერიტორიაზე საპარტნიორო ფონდის ინვესტიციით მიმდინარეობს.

ლურჯი მოცვის მოყვანა-გადამუშავების პროექტი სს „საპარტნიორო ფონდმა“ ადგილობრივ კომპანია სს „ვანრიკ აგროსთან“ ერთად ოზურგეთის რაიონის დაბა ლაითურში დაიწყო. უკვე მუშაობს თანამედროვე ამერიკული ტექნოლოგიით აღჭურვილი გადამამუშავებელი საწარმო, სადაც ლურჯი მოცვის ნაყოფის კალიბრაცია, შეფუთვა და სარეალიზაციოდ მომზადება ხდება. პროექტის ჯამური ღირებულება 6,5 მლნ.აშშდოლარია.