შესაძლოა წყალმოვარდნები განმეორდეს - ,,მეწყერის ამ მასას ვერცერთი გვირაბი ვერ გაატარებდა“

საზოგადოება - 11:05, 17 Jun, 2015

3418

რამ გამოიწვია ტრაგედია თბილისში? იყო ეს მეტეოფაქტორები, თუ არასწორად დაპროექტებული ახალი ესტაკადა დედაქალაქში. ექსპერტები ამტკიცებენ, რომ გვირაბი, რომელიც კომუნისტების დროს იქნა აშენებული, ჯერ კიდევ მაშინ ქმნიდა საშიშროებას, რომლის მაფალითიც გასული საუკუნის 60-იანი წლებში თბილისში მომხდარი სტიქიური უბედურება იყო. გეოლოგი მერაბ ალავერდაშვილმა გადაცემა ,,არჩევანში” სტიქიის 4 მიზეზი განამრტა.

"ყველაფრის მიზეზია მეტეოფაქტორები. არ ვიცით, ნალექი რამდენი მოვიდა. საკითხავია, რამდენმა მილიმეტრმა ნალექმა გამოიწვია ეს წყალმოვარდნა. ჩემი გამოცდილებიდან გამომდინარე ვიტყვი, რომ ეს 180 მილიმეტრი იყო. მეორე არის მეწყრული მოვლენა. ეს კი გლობარული დათბობის გამოხატულებაა. მდინარის კალაპოტი არის გაფართოებული. გამტარუნარიანობა გაიზარდა. 1958 წელს აშენებული ვაკე-საბურთალოს გვირაბი, როდესაც 1960 წელს მდინარემ 5,5 მეტრით მოიმატა, ჩახერგა. ამ წყალმოვარდნის შემდეგ გაჩნდა საკითხი, რომ ჰიდრომეტეოროლოგიური ლაბორატორია გაკეთებულიყო. მაშინაც მოხდა ზოოპარკის დატბორვა. მაშინ ეს ახალი გვირაბი არ არსებობდა და მაინც მოხდა მსგავსი რამ. წყლის ნაკადი, რომელიც წამოვიდა ახლა 500 მეტრ კუბი წამში იყო, რომელიც ამ გვირაბმა ვერ გაატარა. ძველი გვირაბი 80-ს ატარებდა, ხოლო ახალი 400 ატარებს. შესაბამისად, ამ მასას ვერცერთი მათგანი ვერ გაატარებდა,"-განაცხადა მერაბ ალავერდაშვილმა.

გეოლოგის თქმით, 4 ივნისს მოვარდნილმა წყალმა მისი ლაბორატორია დატბორა, თუმცა მიმდინარე პროცესებით გარემოს დაცვის სამინისტრო არ დაინტერესებულა. "მე არ ვარ მოვალე, რომ დავუკავშირდე და ვუთხრა, ჩამოყალიბდებოდა თუ არა მეწყერსაშიშროება. ეს უკვე გეოლოგების საქმეა. გარემოს დაცვის სამინისტროს ჩემთვის არც კი მოუმართავს," - ამბობს ალავერდაშვილი. გეოლოგის მტკიცებით, ბოლო პერიოდში ნალექმა საგრძნობლად იმატა და შესაძლოა, წყალმოვარდნები კიდევ განმეორდეს.