მწერლები და პოეტები დაზარალებულთა დასახმარებლად საკუთარი წიგნებიდან შემოსულ თანხებს რიცხავენ

საზოგადოება - 16:35, 16 Jun, 2015

833

ლიტერატურული პრემია „საბას“ ლაურეატები და ნომინანტები სტიქიით დაზარალებულთა დასახმარებლად ერთიანდებიან და თიბისი ფონდში გახსნილ სპეციალურ ანგარიშზე საკუთარი წიგნებიდან შემოსულ თანხებს რიცხავენ.
სალომე ბენიძე: „ხშირად მიფიქრია იმაზე, რამდენად მნიშვნელოვანია ჩვენი ერთიანი სიტყვა და რომ ასეთ მძიმე პერიოდებში ჩემს თვალს ხშირად დაკლებია ქართველი მწერლების ერთიანი სოლიდარობა. რამდენად მნიშვნელოვანია, რომ შემართება არ გაგვიქრეს და იქამდე ვიდგეთ ერთად დაზარალებულების დასახმარებლად, სანამ ეს საჭირო იქნება,“

გიორგი კეკელიძე: „სიამოვნებით გიერთდებით. ეროვნულმა ბიბლიოთეკამ თავის მხრივ დაიწყო დაზარალებულთა დასახმარებლად საქველმოქმედო აქციები და იქაც შემოგვიერთდით“.

თეონა დოლენჯაშვილი: „ვფიქრობ რომ ყველა სტიქიას, ფიზიკურ ნგრევას და ზარალს, პირველ რიგში, სულიერი და მენტალური საძირკვლების რყევა იწვევს. ჩვენი დაუფიქრებლობა თუ გარემოსამყაროსადმი არასწორი დამოკიდებულება.. ასეთ დროს მწერლებს, სიტყვის ხალხს ყველაზე მეტად მოგვეთხოვება შევქნათ ახალი საძირკველი ახალი და სწორი გზების ასაშენებლად. ერთმანეთის დასახმარებლად და გადასარჩენად. ამიტომ ჩვენი წიგნების გაყიდვებიდან შემოსული თუნდაც სიმბოლური თანხა დაზარალებულთა დასახმარებლად უკვე მნიშვნელოვანია. მადლობა ყველას ვინც ამ კეთილ საქმეს უერთდება,“

ეკატერინე ტოგონიძე: „თბილისი ერთია - ეს სიტყვები ამ დღეების ერთ-ერთი სლოგანია და ჩვენც ერთნი ვართ, მიუხედავად იმისა მოვიქცევით თუ არა ერთივით და გვინდა თუ არა ერთობა... ჩემი კოლეგები თავიანთი წიგნების ჰონორარს, თავიანთი ხელფასის ნაწილს დაზარალებულთა ფონდში რიცხავენ, ამით ჩემ მიერ გადაიცხულ თანხასაც მეტი აზრი ეძლევა და ციფრებთან ერთად იზრდება სწორედ ეს ერთიანობის განცდა და ენერგია“
ტორესა მოსი:„გამომცემლობას მოველაპარაკები და მზად ვარ ჩემი ორივე წიგნის გაყიდვებიდან შემოსული თანხა დაზარალებულთა ფონდში ჩავრიცხო„

გაგა ნახუცრიშვილი: „მე და ჩემი მეგობრები მოხალისეებში ჩავეწერეთ და რაც შეგვიძლია, ვაკეთებთ. არჩილ ქიქოძემ სტიქიის ღამეს რამდენიმე ოჯახი გადაარჩინა. მართალია, ჩვენი ჰონორარები მცირედია, მაგრამ ყველამ თუნდაც ეს მცირედი მაინც რომ გაიღოს, ერთად უკვე ბევრი გამოვა“.