კიბერშეტევა სააგენტო NEWPOSTS-ზე

საზოგადოება - 18:10, 15 Jun, 2015

1005

საინფორმაციო სააგენტო „ნიუპოსტის“ მისამართით ბოლო დღეებია ხორციელდება კიბერშეტევა, კერძოდ, ჰაკერი, რომელიც იყენებდა კონკრეტულ IP-მისამართს, ახორციელებდა "ნიუპოსტის" საიტის ბლოკირებას, რის შედეგადაც საიტი შეფერხებებით მუშაობდა, განსაკუთრებით კი საზღვარგარეთის ქვეყნების მომხმარებლებისთვის.

ამგვარი ქმედების განხორციელება, მითუფრო შემაშფოთებელია ამ მეტად რთულ და ინფორმაციულად დატვირთულ პერიოდში, როდესაც, როგორც საქართველოს მოსახლეობის, ასევე მსოფლიოს სხვადასხვა კუთხეში მცხოვრები ქართველი ემიგრანტების დაინტერესება საქართველოსა და თბილისში მიმდინარე მოვლენებისადმი ასეთი მაღალია. თუ გავითვალისწინებთ, რომ სააგენტოს ვებგვერდს ჰყავს 300 ათასამდე მომხმარებელი, რომელიც ქვეყნის შიგნით თუ მის ფარგლებს გარეთ მიმდინარე მოვლენებს newposts.ge-ს მეშვეობით ეცნობა, აქედან გამომდინარე მიგვაჩნია, რომ ეს არ არის წვრილმანი დანაშაული, არამედ სერიოზული კანონსაწინააღმდეგო ქმედებაა, რომლის მოტივაციაც სამართალდამცავი უწყების შესწავლის საგანია.

სააგენტო ,,ნიუპოსტის" რედაქცია აღნიშნული ფაქტის შესახებ დეტალურ ინფორმაციას მიაწვდის შსს-ს შესაბამის სტრუქტურებს.

ამასთან, ჩვენ მადლობას ვუხდით Silknet-ის თანამშრომლებს, რომლებმაც მოახერხეს ჰაკერის მიერ გამოყენებული IP მისამართის დადგენა და შემდგომი დაბლოკვა, რის შემდეგაც სააგენტო ,,ნიუპოსტის" ვებგვერდი ჩვეულ რეჟიმში ფუნქციონირებს.

"ნიუპოსტის" რედაქცია