ზოოპარკი კომუნისტებმა ტაძრების გადამდნარი ზარების ფასად ააშენეს, ამიტომ ის ვერ გაიხარებს

ზოოპარკი კომუნისტებმა ტაძრების გადამდნარი ზარების ფასად ააშენეს, ამიტომ ის ვერ გაიხარებს - ილია მეორე

საზოგადოება - 14:02, 14 Jun, 2015

5073

საკვირაო ქადაგებაზე დღეს, უწმინდესმა და უნეტარესმა ილია მეორემ თბილისში, ვერეს ხეობაში მოხდარი სწიქიის შესახებ ისაუბრა. უწმინდესის თქმით, თბილისის ზოოპარკის გადატანა სხვა ადგილზე უნდა მოხდეს. ილია მეორემ ზოოპარკის დაარსების ისტორიაზე ისაუბრა.

"მოხდა საშინელი ტრაგედია საქართველოში. ღვარცოფის, ნიაღვრის და წვიმის შედეგად დაიღუპა ხალხი. განადგურდა ზოოპარკი. ცხოველები თავისი ადგილებიდან გადმოვიდნენ და ადამიანებისთვის საშიში გახდნენ. თქვენ ალბათ არც გახსოვთ, რომ რამდენიმე წლის წინ იყო მცირე ინფორმაცია ზოოპარკის შესახებ. როცა კომუნისტები საქართველოში შემოვიდნენ და ქრისტიანების და სამღვდელოების დევნა, ასევე ეკლესია-მონასტრების ნგრევა დაიწყებს, დაიწერა ბრძანება, რომ მონასტრებიდან და ტაძრებიდან ჩამოეყარათ ზარები, გადაედნოთ და ამ ფულით, რასაც მოიპოვებდნენ, ზოოპარკი დაარსებულიყო. ასე რომ, ზოოპარკი დაარსდა ტაძრებისა და მონასტრების ზარების ფასად, ამიტომ ეს ზოოპარკი ვერ გაიხარებს. ზოოპარკი უნდა გაუქმდეს და სხვაგან ახალი ზოოპარკი დაარსდეს, რადგან ეს ზოოპარკი ცოდვაზეა დაარსებული. ბევრს ეს არ ახსოვს და ინფორმაცია ამის შესახებ ჩვენს პრესაში არსებობდა. ცოდვა დაუსჯელი არ რჩება. ვწუხვართ, რომ ქართველი ადამიანი იმდენად დაეცა, რომ საეკლესიო ზარების ხარჯზე და მათ განადგურებაზე ზოოპარკი დააარსეს. აი, ამის შედეგი. დაიღუპნენ ადამიანები და განადგურდნენ ცხოველები", - ბრძანა ილია მეორემ.