რა ვითარებაა სტიქიის ზონაში (ფოტოკოლაჟი ატენის ხეობიდან)

საზოგადოება - 19:14, 12 Jun, 2015

2931

გორის მუნიციპალიტეტის სოფლებში სტიქიის შედეგად მიყენებული ზიანის აღმოსაფხვრელად სამუშაოები დღეს დილიდან დაიწყო. გამგეობა მუშაობის საგანგებო რეჟიმზე გადავიდა. სპეციალური ტექნიკა ატენის ხეობაში გაწმენდით სამუშაოებს ახორციელებს. უკვე მოხერხდა სოფელ ღვარების გზის გაწმენდა. გუშინ საღამოს სტიქიის შედეგად გზაზე რამოდენიმე ადგილას მეწყერი ჩამოწვა, რის გამოც სოფელი ამ დრომდე გარესამყაროს იყო მოწყვეტილი. გაწმენდითი სამუშაოები მიმდინარეობს ასევე ატენში, ოლიზში, წედისსა და ბნავისში. რამოდენიმე საცხოვრებელ სახლთან დაკავშირება ამ დრომდე ვერ ხერხდება. სპეციალისტები წყლის დონის დაკლებას ელოდებიან.გუშინ საღამოს მოსულმა ძლიერმა სეტყვამ და წვიმამ, რამაც ხეობაში მდინარეების ადიდება გამოიწვია, დააზიანა გზები, საცხოვრებელი სახლები, წყლის სათავე ნაგებობები, მოგლიჯა ხეები, განადგურა ნათესები, ვენახი და ბოსტნეული კულტურა. დახოცილია შინაური ფრინველი და პირუტყვი. მთელი ღამის განმავლობაში ატენში, ბნავისში, ოლოზში, ხიდისთავსა და წედსიში მობილიზებული იყო სამაშველო და სახანძრო სამსახურები. ადგილზე იმყოფებოდა გორის მუნიციპალიტეტის გამგებელი დავით ონიაშვილი და გამგეობის თანამშრომლები. გამგეობასთან უკვე შექმნილია სპეციალური ჯგუფი, რომლებიც სტიქიის შედეგად დაზიანებული ინფრასტრუქტურის აღდგენასა და დაზარალებული მოსახლეობის დახმარებას ცდილობს.