საერთაშორისო სავალუტო ფონდის წარმომადგენელი სამხრეთ კავკასიაში აზიმ სადიკოვი ეროვნული ბანკის წარმომადგენლებს და ეკონომიკის ექსპერტებს საქართველოში და რეგიონში შექმნილი ეკონომიკური მდგომარეობის შესახებ ანალიზს აცნობს.

მისი თქმით, საქართველოში ეკონომიკური ზრდის პროგნოზი 2%-მდე შენარჩუნდება, თუმცა ბოლო პერიოდში განვითარებულმა მოვლენებმა აჩვენა, რომ რისკები კვლავ არსებობს.

სადიკოვი ეკონომიკური ზრდის შემცირების და ლარის გაუფასრების მიზეზებზე საუბრობს.

საგარეო ფაქტორებს შორის ის ასახელებს დოლარის გამყარებას და რეგიონში შექმნილ სავალუტო კრიზისს.

"ლარი სტაგნაციაში იყო, ბაზრის მიმართ ნდობის მაჩვენებელი სუსტია, ზრდა პირველ კვარტალში იყო ძლიერი, რაც დროებითი ფაქტორებით შეგვიძლია ავხსნათ. თუ შევხედავთ ეკონომიკის დონეს აპრილის თვეში მან პირველ კვარტალთან შედარებით დაიკლო, მიუხედავად ამისა, ზრდის მაჩვენებელი 2% რჩება. იმპორტის და ექსპორტის კოლაფსმა ზეწოლა მოახდინა ლარზე, ეს სამმა ფაქტორმა განაპირობა -აზერბაიჯანში მანქანების ექსპორტის საკითხმა და უკრინა-რუსეთში არსებულმა სიტუაციამ. ზეწოლა რეგიონში ყველა ეროვნულმა ბანკმა განიცადა, მაგრამ ისინი შეეცადნენ ადეკვატური რეაგირება მოეხდინათ, როდესაც საგარეო შოკები ხანგრძლივია რეზერვის გამოტანა პასუხი არ არის, საჭიროა ეკონომიკა მოერგოს ახალ რეალიებს, მოცემულ სიტუაციაში საგარეო შოკებს ყველაზე კარგად რეგიონში თავი საქართველოს და თურქეთის ეროვნულმა ბანკებმა გაართვეს,"-განაცხადა აზიმ სადიკოვმა.