"ბაგა-ბაღების გარეთ 17 ათასი ბავშვი რჩება"

საზოგადოება - 15:45, 09 Jun, 2015

1504

თბილისის მუნიციპალიტეტის საკრებულოში ფრაქციის ,,ერთიანი ნაციონალური მოძრაობა’’ თავმჯდომარემ სევდია უგრეხელიძემ და ფრაქციის ,,ნაციონალური მოძრაობა-თბილისი’’ წევრმა ირაკლი ნადირაძემ ერთობლივი ბრიფინგი გამართეს.

როგორც სევდია უგრეხელიძემ განაცხადა, თბილისის ბაგა-ბაღები ახალ სასწავლო წლისთვის მზად არ არიან.
მისივე თქმით, ბიუჯეტის ახალი ვარიანტის მიხედვით, მუნიციპალურ ბაღებში ადგილების მატების ნაცვლად კლება ფიქსირდება.
,,ამას კიდევ ერთი პრობლემა ემატება. ახალი კანონის შესაბამისად, 15 სექტემბრის შემდგომ დაბადებული ბავშვები სკოლის გარეთ რჩებიან. ამ ბავშვების საბავშვო ბაღში დატოვება კი ადგილების დეფიციტს გაზრდის’’,-განაცხადა სევდია უგრეხელიძემ.
ირაკლი ნადირაძის ინფორმაციით, დღეისათვის თბილისის მუნიციპალურ ბაგა-ბაღებში 53 000 ბავშვი დადის, თუმცა, მსურველთა რიცხვი გაცილებით დიდია.
ბაგა-ბაღებში ადგილების რაოდენობის შემცირება დეპუტატმა ბაღების სააგენტოს არასწორი პოლიტიკით ახსნა.
ირაკლი ნადირაძემ დედაქალაქის მერს დავით ნარმანიას ,,ერთიანი ნაციონალური მოძრაობის’’ ინიციატივისთვის მხადაჭერისკენ მოუწოდა.
„ჯამში ბაგა-ბაღებში 17 ათასი ბავშვის პრობლემას მივიღებთ. იმის ნაცვლად, რომ საბავშვო ბაღებში ადგილების რაოდენობა გაეზარდათ, შეამცირეს 1000 ბავშვით და წელს 55 ათასის ნცვლად 54 ათას ბავშვს მიიღებენ. შესაბამისად ჩვენ გვრჩება ბევრი ბავშვი ბაღის გარეშე. ჩვენ კიდევ ერთხელ მოვუწოდებთ დავით ნარმანია, ნუ დატოვებთ ამ ბავშვებს დაღის გარეშე",-განაცხადა ირაკლი ნადირაძემ.