ისტორია დედაზე, რომელმაც შვილის გამოჯანმრთელების რწმენით ფეხშიშველმა განვლო გზა ტაძრამდე. პატარა ბარბარეს ხერხემალი აქვს დაზიანებული და სასწრაფო ოპერაცია სჭირდება.

დედა-შვილის ისტორიას სოციალურ ქსელში თინათინ მოსიაშვილი აქვეყნებს.

თინათინ მოსიაშვილი: „ლომისაზე რომ ავდიოდით, ჯერ კიდევ მაშინ შევნიშნე ეს ახალგაზრდა ქალი: გრძელი კაბით და თეთრი მოსახვევით ფეხშიშველა მიდიოდა ტაძრისკენ. გვერდით ასევე ახალგაზრდა კაცი მისდევდა, ბატკანი მოეგდო მხრებზე.

მერე მთის თხემზე ქალი ჩვენ სიახლოვეს დაჯდა, ბავშვს მორიდებით ძუძუს აწოვებდა. თავიდან კადრი მომეწონა და სურათის გადასაღებად მივედი. მაშინვე არა, მერე ამოვიცანი თეთრი თავსაბურავით ქალი, რომელსაც რატომღაც გზაშივე მივაქციე ყურადღება. თუმცა ბავშვი მაშინ თან არ ჰყავდა. გოგონა მთაზე ბიძას ამოეყვანა.

„პრობლემა გვაქვსო",- მითხრა დედამ და დახედა შვილს. ბარბარეს ხერხემალზე სასწრაფოდ სჭირდება ოპერაცია, რომელიც თურქეთში 20 ათასი დოლარი ჯდება. სასურველია, ერთ კვირაში წავიდნენ კლინიკაში.

ჯანდაცვის სამინისტროშ განცხადება შეტანილია და პასუხს ელიან.

წარმოშობით ლაგოდეხიდან არიან. ბავშვი ბარბარე გოგოლაძეა.

იქ, მთაზე სახელები ვუთხარით ერთმანეთს, ნომრები ვერ ჩავიწერე, ჩემდა გასაოცრად, კალამი არ აღმომაჩნდა. თან ერთად ვაპირებდით ჩამოსვლას, თუმცა მერე სხვადასხვა ბილიკზე აღმოვჩნდით. იმავე საღამოს ვცადე ფეისბუკში მოძებნა, მაგრამ ვერ ვიპოვე. აღმოჩნდა, რომ ლევან გოგოლაძეც და ნათია ნოზაძეც ძალიან ბევრია ფბ-ში. საბედნიეროდ, ამ დილას ნათიამ თავად მომწერა.

იქნებ შევძლოთ დახმარება, 20 ათასი დოლარი ერთი ადამიანისთვის და ოჯახისთვის ბევრია, ბევრი ადამიანისთვის - არც ისე.

მეგობრებო, 5 და 10 ლარის ჩარიცხვაც ნუ მოგერიდებათ, ერთობით, ბევრი თუ ვიქნებით, ამ თანხასაც შევაგროვებთ.

ლომისობაზე ასვლა იქნებ მარტო ამისთვისაც ღირდა.

ლომისის წმინდა გიორგის მადლი გეწეოდეთ თქვენც და პატარა ბარბარესაც.

მე მჯერა, მომავალ ლომისობას წმინდა გიორგის ტაძარში ბარბარე, რომელსაც ახლასიარული და დგომა უჭირს, თავისი პატარა ფეხუნებით შებანცალდება“!

ბარბარეს ანგარიშია საქართველოს ბანკი GE98BG0000000340768000 მიმღები ბავშვის მამა ლევან გოგოლაძე.
5 58 18 48 46 ეს არია ნათიას ნომერი.
599 04 04 59 ლევანი.