„მიშას მომენტი“ - ამ სათაურით აქვეყნებს სტატიას ბრიტანული გამოცემა The Economist-ი ოდესის ახალ გუბერნატორ მიხეილ სააკაშვილზე.

„ოდესის ახალ გუბერნატორს მიხეილ სააკაშვილს ბევრი სასარგებლო თვისება აქვს. მან ერთ დროს თამამად განახორიელა წარმატებული ანტიკორუფციული კამპანია და ყველა საგზაო პოლიციელი დაითხოვა. ის არაერთ ენაზე საუბრობს“ - ნათქვამია სტატიაში.

სტატიის ავტორის თქმით, მას შემდგე რაც სააკაშვილმა 2013 წელს საქართველოს პრეზიდენტის პოსტი დატოვა, მის წინააღმდეგ საქმეებია აღძრული და ის საქართველოში დაბრუნებას ვეღარ ახერხებს.
სტატიის მიხედვით, მიხეილ სააკაშვილი, რომელიც 2003 წელს "ვარდების რევოლუციას" მეთაურობდა, ნატოსა და ევროკავშირში საქართველოს გაწევრიანება სცადა, რამაც 2008 წელს, ვლადიმერ პუტინის რუსეთის პატარა კავკასიელ მეზობელთან ომი გამოიწვია.

ავტორის თქმით, ქვეყანაში მაღალ თანამდებობაზე უცხოელის მიწვევა იშვიათი მოვლენა არ არის, თუმცა სენსიტიურ რეგიონზე პასუხისმგებლობა სარისკოა.

„ოდესა პრორუსი სეპარატისტებისთვის სასურველი ადგილია. გასულ წელს ოდესაში 40-ზე მეტი ადამიანი დაიღუპა დაპირისპირების შემდეგ მომხდარი ხანძრის შედეგად, მათი უმრავლესობა პრორუსი აქტივისტი იყო. მას შემდეგ ოდესაში ვითარება დამშვიდდა, თუმცა, დაძაბულობა მატულობს. ამ ყველაფრის გათვალისწინებით, სააკაშვილის ოდესის გუბერნატორად დანიშვნა პუტინის შეურაცხყოფას ისახავს მიზნად, რომლისთვისაც სააკაშვილი არასასურველი პიროვნებაა. 2008 წლის ომიდ დროს პუტინი მას „კვერცხებით დაკიდებით“ დაემუქრა. იმ დროს, როდესაც უკრაინის მთავარ გამოწვევას რუსეთის აგრესია და მასთან მშვიდობის დამყარება წარმოადგენს, ოდესის გუბერნატორად სააკაშვილის დანიშვნა პროვოკაციული ნაბიჯი იყო“ - ნათქვამია სტატიაში.