ახალი ნარკოტიკი ქართულ შავ ბაზარზე - მის მიღება კანზე დაწებების გზით შეიძლება

საზოგადოება - 13:35, 01 Jun, 2015

7315

ოპიუმის პლასტირი – ამ სახელწოდების ახალი ნარკოტიკი საქართველოში ე.წ. შავ ბაზარზე უკვე გამოჩნდა. ამის შესახებ გაზეთი “პრაიმტაიმი” წერს. ინფორმაციას ნარკოლოგიის კვლევითი ინსტიტუტის დირექტორის მოადგილე, ხათუნა თოდაძეც ადასტურებს.

“სამართალდამცავებს ახალი თავსატეხი გაუჩნდათ, ნარკომომხმარებლებს კი – 100-პროცენტიანი ოპიუმის ჯგუფის შემცველი ნარკოტიკი ორიგინალური შეფუთვით. ოპიუმის პლასტირები, შეიძლება ითქვას, ბოლო გამოძახილია ნარკობიზნესში, რადგან მსგავსი დახვეწილი მეთოდით ნარკოტიკით გაბრუება ნამდვილი „ნოუ ჰაუა“. როგორც ირკვევა, ევროპულმა ფარმაცევტულმა კომპანიებმა შთამბეჭდავ მეთოდს მიაგნეს, რომლის მიზანია, პრეპარატი უმტკივნეულოდ, ინექციას გარეშე მოხვდეს ორგანიზმში. კერძოდ, თუ აქამდე მორფინს ინტრავენური გზით, ანუ შპრიცით მოიხმარდნენ, პლასტირის შემთხვევაში საინექციო საშუალებები საჭირო აღარ არის.

ნარკოლოგების ინფორმაციით, პლასტირი გაჟღენთილი და დამუშავებულია ქიმიურად. ოპიუმის ჯგუფის ნარკოტიკის პლასტირს მომხმარებელი ერთი ხელის მოძრაობით იკრავს სხეულზე, კერძოდ, მხარზე და პრეპარატი რამდენიმე წუთში ორგანიზმში შეიწოვება, რაც იწვევს ნარკოტიკულ ზემოქმედებას. ოპიუმის პლასტირებს უკვე აქტიურად მოიხმარენ ესპანეთში, საფრანგეთსა და ევროპის სხვა ქვეყნებში”, – წერს “პრაიმტაიმი”.