ბავშვთა დაცვის დღე თბილისში მასშტაბური ღონისძიებებით აღინიშნება

საზოგადოება - 09:50, 01 Jun, 2015

3188

1 ივნისს, ბავშვთა დაცვის საერთაშორისო დღეს, თბილისი მასშტაბური ღონისძიებებით აღნიშნავს. ღონისძიებები დედაქალაქის ყველა უბანში გაიმართება და ისინი გასართობი და შემეცნებითი პროგრამებით იქნება დატვირთული.

მთავარი ღონისძიება ზოოპარკში 13:00 საათზე დაიწყება. აქ ბავშვებს შესაძლებლობა ექნებათ, ნახონ სპორტული აკრობატიკის საჩვენებელი ნომრები და ილუზიონისტის შოუ, მოუსმინონ ჰამლეტ გონაშვილის სახელობის ხელოვნების სკოლის მოსწავლეებს, საბავშვო ბაღების კოლექტივებს, „ბასტი ბუბუს“ სტუდიის მოსწავლეებსა და საბავშვო სტუდია „სახეს“ წევრებს. აქვე გაიმართება სახალისო ვიქტორინები. დღის განმავლობაში ბავშვებს გაართობენ საქართველოს სახელმწიფო პანტომიმის თეატრის მიმები. სცენის მიმდებარე ტერიტორიაზე განთავსდება „სმარტ ფოტოს“ ჯიხური, რომელშიც ყველა მსურველს ექნება სამახსოვრო ფოტოს უფასოდ გადაღების შესაძლებლობა.

საბავშვო ღონისძიებები გაიმართება, აგრეთვე, ვაკის, მუშტაიდის, დედაენის, გლდანის, კიკვიძის, სამგორის პარკებსა და „მზიურში“.

ზოოპარკში, გლდანის, დედაენისა და სამგორის პარკებში მისულ ბავშვებს ფურცლებზე მსოფლიოს ბავშვებისადმი წერილების დაწერის შესაძლებლობა ექნებათ. 18:00 საათზე მათი წერილები, დიდ საჰაერო ბუშტთან ერთად, ოთხივე პარკიდან ერთდროულად ცაში აფრინდება.