1 ივნისს, ბავშთა საერთაშორის დაცვის დღესთან დაკავშირებით გასართობ ცენტრ „ასტრა პარკში“ საქველმოქმედო აქცია გაიმართება. აქცია ფონდ „იავნანასთან“ თანამშრომლობის ფარგლებში ჩატარდება.

"ასტრა პარკს" 2008 წლის აგვისტოს ომის შედეგად დაზარალებული 20 ბავშვი ეწვევა. ბავშვები დაესწრებიან 15 წლის მხატვრის ნინი ჩხაიძის პერსონალურ გამოფენას, გარდა ამისა მონაწილეობას ე.წ. "ცეკვის კარაოკეში" მიიღებენ, კარტინგში შეეჯიბრებიან ერთმანეთს, 7D კინოთეატრში სუპერთანამედროვე ფილმის ჩვენებას დაესწრებიან, ასევე გაერთობიან სათამაშო აპარატებით და სამაგიდო თამაშებით.

აქციას საქველმოქმედო ფონდ „იავნანას“ დამფუძნებელი პაატა ბურჭულაძე და გაეროს ბავშთა ფონდის (UNISEF-ის) წარმომადგენელი საქართველოში საშა გრაუმანი დაესწრებიან.

შეგახსენებთ, რომ ფონდ „იავნანასთან“ თანამშრომლობით „ასტრა პარკი“ საქველმოქმედო აქციებს ყოველ მეორე ორშაბათს ატარებს.