თბილისის ზოოპარკში ვეფხვის მიერ დაგლეჯილ ქალბატონს ხელის ამპუტაცია ჩაუტარდა.

როგორც ცნობილია, მას დაზიანებები მთელ სხეულზე აღენიშნებოდა.

"ბოლო მონაცემებით ამგვარი ვითარებაა: ოპერაცია დასრულდა. სამწუხაროდ ხელის შენარჩუნება ვერ მოხერხდა და მისი ამპუტაცია გახდა საჭირო. ძალიან ღრმა ჭრილობებია ფეხზეც, თუმცა თუ ინფექცია არ განვითარდება, ფეხის შენარჩუნება შესაძლებელი იქნება. სერიოზული დაზიანებებია ტანის არეშიც. ამჟამად მდგომარეობა სტაბილურად მძიმეა. სიცოცხლისთვის ბრძოლა ჯერ არ დასრულებულა, რადგან არსებობს ინფექციის გავრცელების რისკი. ამ ეტაპზე ყველა აუცილებელი პროცედურა ჩატარებულია. პაციენტს უტარდება მკურნალობა შესაბამისი მედიკამენტებით", - ნათქვამია ზოოპარკის ადმინისტრაციის მიერ გავრცელებულ ინფორმაციაში.

შემთხვევა ზოოპარკში გუშინ მოხდა. ვეფხვმა მომვლელი ქალი დაგლიჯა.

ზოოპარკის ადმინისტრაციის ინფორმაციით, ინციდენტი იმ მომენტში მოხდა, როდესაც ის ცხოველის ვოლიერის გისოსებთან, მომვლელების სამუშაო ზონაში იმყოფებოდა.